Derrota do Viaxes Amarelle FSF na súa visita ao Futsi Atlético Navalcarnero na cancha de La Estación. As galegas perderon por un marcador de 6-2 nun partido correspondente á oitava xornada da Primeira División Feminina do Fútbol Sala da RFEF.
O reto de gañarlle ao Fútsi Atlético Navalcarnero é xigantesto. Máis aínda para un equipo como o Viaxes Amarelle FSF, que ten como meta este curso manter a categoría. Pero sempre hai que tentar saltar á cancha a gañar, e así o fixeron as coruñesas que venderon cara a súa derrota diante dun club doutra galaxia.
O Viaxes Amarelle FSF afrontaba un complicado partido visitando a cancha dun líder indiscutible, Futsi Atlético Navalcarnero, que non coñece a derrota en liga desde febreiro de 2018. As herculinas xogaron moi serias e disputaron un bo partido contra o conxunto madrileño, que ten unha definición espectacular, e un nivel individual de xogadoras superior; que o segue facendo un dos favoritos ao título de liga. As galegas pelexaron, pero terminaron por ceder unha derrota por 6-2, con goles galegos de Candela Soria e Cris Lourés.
O partido empezou cun Viaxes Amarelle FSF esperando en cancha propia as arremetidas do Futsi Atlético Navalcarnero, coa intención de saír á contra. Pero aos dous minutos de xogo as locais adiantábanse no marcador, cun potente disparo exterior de Irene Córdoba que impactaba no pau. O rexeite daba nas costas de Leti e íase ao fondo da rede, subindo o 1-0.
Un gol de Candela metía de novo ao Amarelle no partido 2-1
Un gol tan temperán, complicaba o partido das galegas, pero seguían coa mesma intención e mesmo xogo. Aos catro minutos atopábanse co 2-0, tras un disparo exterior de Gaby que puña o 2-0. O partido parecía que selles ía, pero apenas uns segundos máis tarde, as herculinas recuperaban o balón en media cancha, e Candela Soria en xogada persoal corría contra a porteira local, e no un para un, batía por baixo a Belén de Uña e puña o 2-1 no marcador.
Tras este gol, o partido parecía que se ía igualando en canto a intensidade, aínda que todo o peso do balón e do partido tíñano as locais, que buscaban ampliar distancias, mentres as galegas resistían os ataques, con boas aparicións de Leti Rojo baixo paus. Pero a falta de sete minutos para o tempo de descanso, unha mala decisión nun balón morto na área, é aproveitado polas locais. Foi a través dun balón morto que recolle Ari e colócao ao segundo pau, para que María Sanz subise o 3-1 ao marcador.
Logo dese tanto o Viaxes Amarelle FSF volveu ter unha gran xogada de ataque, nunha contra, novamente, de Candela Soria, que nesta segunda ocasión mandaba o balón por fóra, por moi pouco.
O Futsi Atlético Navalcarnero seguiu tentando ampliar a renda, pero as herculinas conseguiron manter a diferenza no marcador até chegar ao tempo de descanso.
O Futsi aumenta a ventaxa á 4-1 cunha xogada de Anita Luján
A segunda metade empezaba cun Viaxes Amarelle FSF que subía un punto a intensidade na presión sobre as locais, pero non conseguía atopar o premio de xerar o perigo á contra. Mentres, o Futsi Atlético Navalcarnero tocaba o balón, para ampliar distancias. Conseguíao ao cinco minutos, tras unha xogada persoal de Anita Luján, que cede o balón a Amelia Romeu, a cal arma un potente disparo desde a frontal para subir o 4-1 ao marcador.
As herculinas non baixaban os brazos, e tres minutos máis tarde María Gómez arma unha xogada persoal e xera unha contra onde cede o balón a Lau Doce, que en última instancia toca o esférico ao segundo pau. Alí estaba agardando Cris Lourés que non perdoou e fixo subir ao marcador o 4-2.
Aínda quedaba moito partido por diante. O conxunto herculino pelexaba por recortar distancias, mentres que as locais querían ampliar a súa renda. Con todo, o partido íase igualando por momentos, aínda que con pouca chegada a portaría contraria das herculinas.
A falta de catro minutos, o equipo dirixido por Jorge Basanta opta por probar con xogo de cinco, para recortar distancias; pero non atopa fortuna nas súas intencións.
O Futsi aumenta a distancia nos minutos finais
A falta dun minuto e medio para o final do encontro, María Sanz pon o 5-2 no marcador; e cando apenas restaban 30 segundos de partido. Anita Luján emprende unha xogada persoal en cancha propia, leva a dúas xogadoras herculinas e corre toda a cancha, para ceder o balón, en última instancia, a Ariane. A xogadora local non perdoa e sobe o 6-2 ao marcador. Ese sería, ao cabo, o resultado definitivo do partido.
Partido serio do conxunto herculino, fronte a un rival doutro nivel. O cadro galego non baixo os brazos en ningún momento, tratando de achegarse no partido a un rival que aspira a todo e que leva sen perder un partido en competición ligueira desde fai case tres anos.
Coa mirada posta xa no cruce co Envialia do martes
Tras este novo encontro da tempada oficial, o Viaxes Amarelle FSF regresa onte sábado en autobús á cidade da Coruña. Hoxe domingo 6 de decembro, ten marcada unha sesión de adestramento, para preparar o próximo partido.
Por decisión do Comité de Competición, o partido aprazado da primeira xornada, das herculinas, na Primeira División Nacional Feminina, o cadro herculino disputará a primeira xornada do subgrupo A, o martes 8 de decembro de 2020 ás 12:00 horas no Pazo dos Deportes Paco Paz de Ourense. Alí aproveitará o festivo para visitar a outro galego: Ourense Envialia FSF.
FICHA TÉCNICA
FUTSI ATLÉTICO NAVALCARNERO: Leti Rojo, Martita, Lau Doce, Yaiza e Candela Soria – quinteto inicial -. Tamén xogaron: Patri Corral, Cris Lourés e Sofía.
VIAXES AMARELLE FSF: Belén de Uña, María Sanz, Ariane, Anita Luján e Irene Córdoba – quinteto inicial -. Tamén xogaron: Gaby, Becha, Albita, Ame Romero e Marta Balbuena.
GOLES: 1-0 Irene Córdoba (min. 2); 2-0 Gaby (min. 4); 2-1 Candela Soria (min. 5); 3-1 María Sanz (min. 13); 4-1 Amelia Romero (min. 25); 4-2 Cris Lourés (min. 28); 5-2 María Sanz (min. 39); 6-2 Ariane (min. 40).
ÁRBITROS: David Fernández e Roberto Villa do Colexio de Árbitros de Madrid. Mesa: Ana Sánchez do Colexio de Árbitros de Madrid.
TARXETAS: Foron amonestadas Ariane e Gaby do Futsi Atlético Navalcarnero con cartón amarelo; e Cris Lourés e Sofía pola parte do Viaxes Amarelle FSF, tamén con cartóna amarelo.
INCIDENCIAS : Partido correspondente á oitava xornada do Subgrupo A da Primeira División Nacional Feminina de Fútbol Sala disputado no Pavillón Municipal da Estación (Navalcarnero – Madrid) entre o Futsi Atlético Navalcarnero e o Viaxes Amarelle FSF.
MIRA O PARTIDO FUTSI ATL. NAVALCARNERO VS VIAXES AMARELLE NA CANLE DE FOOTBALL PLANET