O Durán Maquinaria Ensino despediu unha nova tempada na LF Endesa, despois dun curso de altibaixos, cunha derrota no Pazo ante un incansable SPAR Girona.
As galegas xogaban en casa ante o seu público, que deu forza ao conxunto para medrar co paso dos minutos, rematando o partido nun 69-75.
O Ensino lastrou un mal inicio de partido
Con todo listo no Pazo para a despedida ligueira, o conxunto local saltou ao parqué cun quinteto formado por Lizarazu, Van den Adel, Aliaga, Oma e White.
Nos primeiros compases do partido, o cadro catalán foi superior, dominando claramente desde o tiro exterior e impoñéndose ante un Ensino sen ideas. O primeiro cuarto rematou nun 13-25.
Co apoio da afección na bancada, as xogadoras adestradas por Fernán Varela reaccionaron e tras a reanudación souberon superar a defensa rival para sumar puntos baixo o aro e reducir distancias. O Girona chegaría ao descanso gañador, pero coas galegas pisándolle os talóns nun 35-46.
Con Van den Adel e White, xunto a Sofia Gomes, liderando o apartado anotador local, o Ensino viuse tras o paso por vestiarios con opcións de asinar unha remontada.
Con todo, a superioridade das catalás na liña de tres mantiña o colchón de puntos sobre as lucenses, que non daban coa clave para frear defensivamente ás visitantes.
A falta de 10 minutos, o partido semellaba decidido, pero as galegas deron un impulso máis. Para despedir unha tempada marcada polas lesións e as adversidades, o conxunto de Lugo empregouse a fondo no tramo final do partido, anotando un parcial 14-2.
O Girona non ía deixarse vencer facilmente, e da man de Mendy e Burke o duelo volveu a estar baixo o seu control para afianzar a derrota lucense nun 69-75 final.
O cadro do Ensino remata o curso 2021-2022 na décima posición, con 42 puntos, e un balance de 12 vitorias e 18 derrotas.
Se acabó la temporada, una temporada histórica en nuestro 40 aniversario. Llevamos a Lugo por Europa por primera vez, sufrimos lo que no está escrito con las lesiones, sufrimos en la clasificación pero terminamos como se merecía el equipo, disfrutando sobre la pista‼️‼️ pic.twitter.com/hfO5vFyyJC
— Ensino Lugo (@EnsinoLugoCB) April 17, 2022
FICHA TÉCNICA
DURÁN MAQUINARIA ENSINO: Marina Lizarazu (2), Laura Aliaga (5), Helena Oma (2), Van den Adel (19), Chatrice White (14) —quinteto inicial—. Tamén xogaron: Alba Prieto (6), Alessandra Orsili (3), Georgina Bahí (5) e Sofía da Silva (13)
SPAR GIRONA: Laia Palau (6), Mendy (15), Araújo (4), Burke (18), Reisingerova (13) —quinteto inicial—. Tamén xogaron: Drammeh, Flores (5), Gardner (10) e Labuckiene (4)
MARCADOR: 13-25, 22-21, 14-18 y 20-11.
ÁRBITRAXE: Zafra Guerra, Checa Nebot e Ibañez García.
INCIDENCIAS: Partido correspondente á última xornada da LF Endesa disputada no Pazo dos Deportes de Lugo.