Despois dun ano sen torneos, volta o BTT galego. As bikers volverán a comeptir durante esta fin de semana. O III Trofeo BTT-XCO Concello de Cañiza e o III Mini BTT Concello de Santiago abren a tempada marcada polos estritos protocolos sanitarios.
Seguindo as recomendacións establecidas por mor da COVID-19, os trofeos celebraranse sen público e só poderán participar corredoras galegas portando máscara.
O III Trofeo BTT-XCO de Cañiza
Na cita que da comezo á Copa Galicia de Cross Country Olímpico, as deportistas deberán presentar o certificado negativo en tests para detectar o coronavirus e só poderán retirar a máscara 15 segundos antes de entrar en competición.
O torneo de BTT de Cañiza, organizado pola Grupeta Pan de Zarko, é mostra do interese e expectación polo regreso do XCO galego. Ata 240 corredoras competirán nesta proba polos maillots de líderes do certame autonómico da modalidade olímpica.
As carreiras no circuíto do campo de fútbol de Augas Férreas comezarán ás 16:00 horas coa primeira quenda de saídas na que tomarán parte os rapaces cadetes, os máster-40 e os máster-50-60. A segunda manga dará inicio ás 18:00 e terá como protagonistas a todas as categorías femininas, aos elite-sub23, aos juniors e aos máster-30.
Competición para as máis pequenas
A competición do BTT continuará en Santiago de Compostela co Mini BTT, previsto para este domingo. En total participarán 460 ciclistas en dúas sesións para evitar aglomeracións, segundo informa a Federación Galega de Ciclismo.
Pola mañá rodarán no circuíto ao carón do Estadio Vero Boquete as rapazas e os rapaces das categorías Principiante (10:00 horas), Alevíns (11:50) e Infantís (13:50), mentres que pola tarde será a quenda das probas Benxamíns (17:00) e Promesas (18:00). O uso da máscara será obrigatorio tanto nos adestramentos como nas carreiras.
