O pavillón da Gándara, en Narón, acolleu o primeiro derbi galego de baloncesto, entre un BAXI Ferrol e un Ensino que non defraudaron sobre a pista. O encontro seguiu o guion esperable dun partido de pretempada, pero deixando ver xa a calidade de ambos conxuntos. Cun 73-65 final, as ferrolás alzáronse co trofeo do I Torneo Cidade de Narón e a vitoria do primeiro duelo galego.
Nos primeiros minutos de xogo, tanto o BAXI, como o Durán Maquinaria Ensino saltaron á pista seguros de si mesmos, pero sen acerto baixo o aro. As perdas de balón eran constantes en ambos equipos, que contan con xogadoras que aínda están acostumándose ao ritmo dunha nova tempada.
As lucenses puxéronse por diante pasado o ecuador do primeiro cuarto, pero entón as locais apareceron con Irene Garí e Villegas, loitando polo partido. Porén, o Ensino, cunha acertada Aliaga mantivo a vantaxe rematando o parcial no 10-16.
No segundo cuarto, as ferrolás sairon con forza reaccionando e asinando un parcial 15-0 cun gran traballo defensivo. O Ensino loitaba por aumentar a presión, pero a igualdade do encontro seguía a ser máxima. Cun gran esforzo local, o BAXI chegou ao descanso xa por diante, cun 31-28.
Tras o paso por vestiarios, as da cidade departamental continuaron dominando o balón, mentres que as lucenses pisábanlles os talóns. Porén, as locais souberon aproveitar a vantaxe conseguida, aumentando o seu colchón de puntos rematando o terceiro cuarto nun 60-48.
Nos últimos dez minutos, o Ensino saiu con todo á pista. Cun gran parcial 0-13, as lucenses deixaban o marcador aínda aberto, forzando ás ferrolás a subir o nivel para facerse coa vitoria. O BAXI non decepcionou, e cun parcial 7-0, lograban alzar o título cun 73-65 final.
Neste encontro, a máxima anotadora foi Taylor Koenen, do BAXI, quen sumou 18 puntos. Seguiuna de preto Aliaga, do Ensino, con 12.
¡El mejor reflejo, un equipo unido! #SienteElUni https://t.co/4CEMa3jfX9
— Alicia V. (@alivillegass) September 9, 2021
Lino López e Miguel Ángel Ortega coinciden en calificar o encontro como “un partido típico de pretempada”
Nas declaracións postpartido, o técnico do equipo campión, Lino López, analizou a actuación das súas pupilas, asegurando que foi un “partido tipico de pretempada, con moitos erros ao principio e perdas de balón”, pero salienta o positivo, afirmando que “o equipo pelexou cada balón, está medrando, imos coñecéndonos un pouco máis, vendo onde están as vantaxes e sobre todo moito mellor en temas defensivos. Fumos moi duras no rebote”.
O adestrador confesou que a baixa de Ari condicionou as rotacións e a falta de Jenna Allen nótase no conxunto. Porén, López asegura estar “moi contento co equipo, está traballando moi ben”. Preguntado polo nivel das xogadoras, o preparador entende que “moitas están en moitos momentos do partido perdidas, pola forma de xogar e as situacións de xogo, pero creo que pouco a pouco van entendendo onde poden estar as vantaxes. Son xogadoras xenerosas que sempre buscan a mellor opción e iso é bo para nós”.
Pola súa banda, o técnico rival, Miguel Ángel Ortega, coincide en calificar ao encontro como o “típico partido de pretempada, con bos momentos, malos momentos, boísimos, malísimos…”. Pero afirma que “o partido estivo entretido e creo que nos vale aos dous equipos para acabar de perfilar ao noso equipo”.
Nas filas lucenses faltaron por lesión nomes importantes como o de María, Tamara e Alba, que porén estarán probablemente listas para o inicio do curso ligueiro. De cara as vindeiras semanas, o adestrador agarda “empezar a adestrar en condicións, a construír o que agardamos”.
Na pasada campaña, o Ensino deixou o listón moi alto, coa clasificación para a Copa da Raíña, o playoff e rematar entre os sete primeiros. Así, coa vista posta nunha nova campaña, Ortega asegura que “a ilusión sempre é mellorar, que o club siga a progresión que tivo estes últimos anos. O proxecto sempre é ambicioso loxicamente. Somos un club con moitas ganas de medrar e a nosa ambición é máxima”.
