Coa tempada 2021/2022 xa a vista, o CB Arxil comeza a planificar o próximo curso das verdes. O club de Pontevedra competirá na Liga Feminina 2, que coa creación da LF Challenge, pasará a ser a terceira categoría do baloncesto feminino español.
Nestas semanas o equipo galego comeza a traballar no proxecto da vindeira campaña. Maite Méndez e o staff técnico e a directiva analizan o estado do conxunto para crear un equipo o máis competitivo posible.
Os nomes do próximo plantel do Arxil
Algunhas das pezas clave do equipo non seguirán no plantel. O grueso do equipo do Arxil para o seguinte curso poderá estar conformado por Cris Díaz, Margarita Moreira, Aldara Vázquez e Noa Casalderrey, que traballan varios días á semana no Universitario, e xogadoras do Mafari Café como Mariña Vázquez, Sandra Carabelos, Arantxa Fernández. Violeta Crespo e Carla Fernández. María Lago segue a recuperarse das súas lesións.
Segundo informa o propio club, a continuidade de varias destas xogadoras está preto, mentres que doutras estase a reflexionar sobre o papel que poidan ocupar. Todo dependerá do orzamento das verdes para a tempada 2021/2022.
As continuidades no Arxil dependerán tamén en gran medida de Maite Méndez, xa que coñece ben ás súas xogadoras e as posibles fichaxes. O feito de competir na terceira categoría condicionará tamén o plantel das pontevedresas.
Unha das maiores incógnitas é a de Forster. A xogadora norteamericana deixou grandes sensacións en Pontevedra, pero conta con propostas doutros clubs sobre a mesa.
