- A deportista viguesa Nadia Bouzas logrou a medalla de prata, mentres que Noa Romero quedou xusto ás beiras do podio neste Europeo de Taekwondo
- Nas xornadas previas, Tania Castiñeira (+73, Hebe) tiña conseguido o título de campioa de Europa sub 21, despois dunha competición excepcional e unha final moi apertada e Nuria Cernadas, Desi Rivadulla e Arlet Ortiz quedaron ás beiras da medalla, ao caer nos cuartos de final.
Nova medalla galega en Tallín. Nadia Bouzas (-37, Kae Sport) logrou a prata no Campionato de Europa Cadete de taekwondo, que se está a disputar estes días na capital de Estonia. Nadia Bouzas tivo unha gran actuación e só sucumbiu ante a turca Gurbuz.
Nadia Bouzas fixo un magnífico campionato logrando proclamarse subcampioa de Europa da categoría cadete. A viguesa comezou a competición nos oitavos de final contra Jenna Rama (Finlandia). A taekwondista galega controlou o combate dende o inicio e foi moi superior para finalizar con diferencia de 20 puntos (25-3) e avanzar aos cuartos. A seguinte rival da viguesa foi a grega Despoina Nalmpanti (Grecia), pero Nadia Bouzas mantivo o nivel, con moita tranquilidade e controlando o enfrontamento dende o inicio (25-14).
Así se plantou na semifinal ante a cabeza de serie número 1, Milica Vasic (Bosnia Herzegovina). A galega sabía que sería unha rival moi dura e conseguiu descolocala cambiando o ritmo do combate e así logrou impoñerse por 26-12.
Así foi a final de Nadia Bouzas
A final foi ante Hayrunnisa Gurbuz (Turquía), unha rival moi forte e técnica, coa que Nadia Bouzas xa se enfrontara na semifinal dos Multi European Games en Bulgaria. No primeiro asalto a nosa deportista logrou controlar a Gurbuz, pero despois a turca foi mellor e logrou o ouro.
Fantástico o traballo da taekwondista galega, que logrou a prata nun Campionato de Europa. O seu adestrador, Carlos Manzano destacou: “Estamos moi orgullosos con Nadia e o seu traballo. Ademais, ser subcampioa de Europa no seu segundo ano de cadete é todo un logro”.
Ver esta publicación en Instagram
Noa Romero chegou a cuartos
Pola súa banda, a tamén galega Noa Romero, que competía no peso de -44kg como cadete e que é do Natural Sport, caeu nos cuartos de final por un punto despois dunha magnífica remontada e tamén competiu en cadetes Pablo Torrado (-41, Suh Costado) e cos Sub-21 Ainhoa García (-67, Couto), segundo informa a Federación Galega de Taekwondo.
Noa Romero estivo moi preto de subir ao podio. En oitavos gañou á ucraína Natalii Kozlova por 11-5, nun combate moi controlado. Nos cuartos enfrontouse á belga Elien Rabaut. Foi unha loita moi aberta e intensa, na que ambas taekwondistas impuxeron un nivel moi alto de intercambios. No tramo final, Noa conseguiu remontar un diferenza de 10 puntos para quedar a só un punto da belga ao remate do combate. E por último, en cadetes, sinalar que Pablo Torrado perdeu no seu primeiro enfrontamento ante o representante de Chipre Ioannou Stelios (27-10).
Aos Sub-21 quédalles unha xornada
Ainoha García (-67, Couto) non tivo sorte neste Campionato de Europa sub 21. Caeu de forma clara no primeiro combate ante a dura Ikra Kayir (Turquía). Hoxe non foi o día da nosa taekwondista, que estivo nerviosa e non amosou do que é capaz.
Queda unha xornada para que remate o Europeo de Taekwondo na categoría Sub-21 coa participación dos galegos Pablo Patiño, Adrián Salanova e Cloe Iglesias.
Nas xornadas previas, a taekwondista galega Tania Castiñeira (+73, Hebe) tiña conseguido o título de campioa de Europa sub 21, despois dunha competición excepcional e unha final moi apertada e Nuria Cernadas, Desi Rivadulla e Arlet Ortiz quedaron ás beiras da medalla, ao caer nos cuartos de final.
Tania Castiñeira, campioa de Europa Sub-21 +73 Hebe en taekwondo
