- Lorena Patiño vai coa Selección Española cadete de ciclismo a competir na proba de Cross Country Olímpico (XCO) do Festival Olímpico da Mocidade Europea 2023.
A gañadora nos dous últimos anos do campionato estatal cadete de Cross Country vén de recibir por primeira vez a chamada da Selección Española. Lorena Patiño debutará nunha gran cita internacional o 26 de xullo no Festival Olímpico da Mocidade Europea 2023. Trátase duns pequenos Xogos Olímpicos para deportistas europeos en idade cadete ( de 15 e 16 anos). A edición de 2023 vaise celebrar entre os días 23 e 29 de xullo na cidade eslovena de Maribor. A marinense do XSM disputará a proba de XCO.
A convocatoria do combinado da Real Federación Española de Ciclismo (RFEC) está composta por seis ciclistas, catro de Estrada e dous de BTT. As competicións de Cross Country Olímpico, que serán nas que participará a galega Lorena Patiño, terán lugar no Bike Park Pohorje, o máis grande de cantos hai en Eslovenia. Nese escenario a ciclista do XSM desfrutará a vindeira semana dunha experiencia inesquecible.
No programa de competición do Festival Olímpico da Mocidade Europea 2023 inclúese a disputa de probas contra o reloxo, probas en liña de estrada e as de Cross Country Olímpico.
Tal e como indicamos previamente, o Bike Park Pohorje será o escenario das carreiras de XCO, que terán lugar o 26 de xullo. As probas contra o reloxo, que se van correr o día 25 de xullo, e as probas en liña, que se celebrarán o día 27, van ter lugar polas rúas da cidade eslovena de Maribor.
Lorena Patiño, na media ducia de ciclistas do equipo español
Segundo explica a Real Federación Española de Ciclismo (RFEC) as competiciones femininas de estrada, a crono e liña, vana disputar Paula Ostiz, que o ano pasado xa foi segunda en ambas probas nesta mesma competición, e Leyre Almena. No caso dos representantes masculinos do equipo español serán Eric Igual e Benjamín Noval. Polo que atinxe ás carreiras de XCO vanas disputar vestindo as cores da Selección Española Lorena Patiño e Martí Martínez.
Neste ano, 2023, Lorena Patiño vén de proclamarse campioa de España de ciclocrós, revalidou o título de XC e venceu no Campionato de Galicia de fondo en Estrada.
España leva a 81 deportistas dos cales 53 son mulleres
Segundo informa o COE, a este Festival Olímpico da Mocidade Europea de verán 2023 que terá lugar na localidade eslovena de Maribor España contará cunha delegación composta por un total de 81 deportistas, dos cales 28 serán mozos e 53 mozas.
O equipo de España participará nas modalidades de atletismo, baloncesto 3×3, balonmán, ximnasia, judo, natación, skateboarding, tenis, e como falamos previamente, ciclismo que é a disciplina na que competirá a galega Lorena Patiño. Desta forma, haberá representación española en nove dos dez deportes que forman parte do programa, sendo a competición de voleibol a única na que non participe ningún combinado do noso país.
Nesta décimo séptima edición, daranse cita máis de 3.600 deportistas de entre 14 e 18 anos de 48 países. Todos eles formarán parte deste evento continental organizado polos Comités Olímpicos Europeos, baixo o patrocinio do Comité Olímpico Internacional.
O Festival Olímpico da Mocidade é un trampolín para os novos atletas europeos que soñan con alcanzar a gloria olímpica, dándolles unha primeira mostra do que significa competir nunha competición similar a unha competición similar a uns Xogos Olímpicos. Ademais, en liña coa vocación educativa do Movemento Olímpico, este acontecemento ten como obxectivo ensinar aos atletas, a súa contorna e afeccionados os tres valores fundamentais do olimpismo: a excelencia, o respecto e a amizade.
Na edición de 2022, celebrada na cidade eslovaca de Banska Bystrica, a delegación española concluíu terceira no medalleiro cun total de 19 metais: 8 ouros, 7 pratas e 4 bronces.
