O Coliseum da Coruña acollerá esta fin de semana a XVIII Copa Cidade da Coruña de Taekwondo, que contará coa participación duns mil deportistas de todo o territorio estatal, convertendo a cidade no epicentro desta disciplina. O Concello da Coruña organiza esta proba en colaboración coa Federación Galega de Taekwondo e a Escola de Taekwondo Garrapucho.
Esta competición é unha das máis emblemáticas deste deporte das que se programan en Galicia e permitirá ver en directo os mellores deportistas nacionais, que buscarán acadar bos resultados de cara ao resto de eventos nacionais e internacionais.
Competición válida para o ránking estatal máster de taekwondo
Este campionato serve en Galicia para clasificarse para as diferentes competicións estatais de cada categoría. Tamén é válido para o ránking estatal na categoría Máster, que dá acceso ao Mundial e ao Europeo.
Participarán persoas de ata oito categorías: infantil, precadete, cadete, júnior, sénior e máster 1, 2 e 3. O sábado 10 a xornada de mañá comezará ás 09.00 e rematará ás 14.00 horas. Pola tarde, o horario de competición será de 15.00 a 20.00 horas. O domingo a xornada comezará ás 09.00 horas. A entrada ao recinto será gratuíta ata completar a capacidade en ambas as xornadas.
Á cita do Coliseum da Coruña acuden deportistas, técnicos, colectivo arbitral e membros da organización. Como todos os anos, a organización realizará unha recollida de alimentos a favor da Cociña Económica da cidade herculina.
Máis de 50 clubs chegados de toda España
En total, neste gran evento contarase con 640 deportistas de 51 clubs de toda España (Asturias, Cataluña, Castela e León, Andalucía, Canarias, Baleares e por suposto Galicia), ademais de países como Portugal. Tamén están inscritos na Copa Cidade da Coruña 93 técnicos/as, 25 voluntarios/as, 40 árbitros/as e 2 médicos. Como indicabamos previamente, o torneo é rankeable no ámbito galego e tamén no estatal na categoría máster.
A Copa Cidade da Coruña, organizada pola Escola de Taekwondo Garrapucho, disputarase na modalidade de combate en todas as categorías e ademais en infantil, precadete e cadete haberá Liga B. Para a celebración de todos os combates disporanse 8 tapices no Coliseum.
O sábado pola mañá (de 9 a 14 horas) celebrarase a competición das categorías infantil e júnior, mentres que pola tarde (de 16 a 20:00 horas) será a quenda para precadetes, sénior e máster. A Copa Cidade da Coruña finalizará o domingo pola mañá (de 9 a 14:00) coa disputa da categoría cadete.
Recollida de alimentos para a Cociña Económica
Como todos os anos, a Escola de Taekwondo Garrapucho organiza unha recollida de alimentos a favor da Cociña Económica da Coruña, con máis de 130 anos de historia.
A entrada ao recinto será gratuíta, polo que a organización anima a todos os participantes no evento (deportistas, árbitros, técnicos e público) a doar alimentos non perecedoiros, que se entregarán a esta emblemática institución benéfica.
O Concello da Coruña “mantén a súa aposta pola promoción do deporte e a programación na nosa cidade de grandes eventos que permitan, á vez que fomentan a participación da cidadanía no tecido deportivo, visibilizar A Coruña no exterior e xerar un retorno económico inmediato”, sinalaba Manuel Vázquez, concelleiro de Deportes. Vázquez recibiu no Palacio dos Deportes de Riazor á directiva e integrantes da Escola de Taekwondo Garrapucho, aos que agradeceu o seu labor na organización deste evento de carácter estatal.
