A ciclista María Filgueiras, do Caimanes Betanzos, mantense como líder do Open de España XCO no seu primeiro ano como cadete. A galega rematou a penúltima cita do campionato estatal, celebrada en Candeleda (Ávila) en terceira posición, por detrás de Uxía Soto, do Avanza-O Porriño, quen se colgou a prata.
A competición disputouse nun circuíto técnico, no que as deportistas tiveron que dar dúas voltas. Na clasificación final, tres galegas cadetes entraron no top 4, pero o primeiro posto do Cross Country Olímpico foi para a alacantina Carla Moreno, do Fundación José Sabater.
Só 25 segundos detrás dela quedou Uxía Soto, do Avanza, cun tempo de 0:42:21. Na posición de bronce finalizou a campioa da anterior xornada do Open, María Filgueiras, do Caimanes, a dous minutos do triunfo, cun tempo de 00:43:57. Seis segundos por detrás finalizaría Aroa Otero, tamén do Avanza, quen foi cuarta clasificada parando o reloxo nos 00:44:03.
Outras dúas galegas, Sarela Conde (Academia Postal-Abanca) e Marta Estévez (Avanza-O Porriño) tamén se meteron entre as dez primeiras, ocupando a oitava e a décima posición respectivamente.
A falta dunha carreira para a conclusión do calendario do Open, Filgueiras suma 530 puntos, superando en 20 a Moreno e en 103 a Soto. O certame estatal conclúe este vindeiro domingo na localidade balear de Cala Ratjada.
