A xogadora arxentina Julieta Mungo comprometeuse co BAXI Ferrol para a próxima tempada na Liga 2.
A xogadora, de 22 anos e 1.83 metros, vén de xogar a pasada tempada nas filas do Patatas Hijolusa de León, co que disputou máis de trinta minutos en todos os partidos, achegando unha media de 11 puntos e 6,6 rebotes.
Julieta destaca por ser moi rápida e tanto pode xogar en posicións interiores como exteriores, xa que é moi versátil na cancha.
A á-pivote, nacida en Buenos Aires, leva nas seleccións de base arxentinas desde que tiña 14 anos e agora xa está integrada na absoluta, ademais de ser unha integrante da selección que disputou o Mundial 3×3.
Julieta gañou a liga arxentina en dúas ocasións vestindo as camisetas do Berazategui e Quimsa.
A xogadora destaca sobre a súa incorporación no equipo departamental que “decidín fichar no BAXI Ferrol porque é un club que ten os obxectivos moi claros, onde se traballa moito e onde espero crecer como xogadora”.
Julieta Mungo, xogadora do BAXI Ferrol: “Decidín fichar no BAXI Ferrol porque é un club que ten os obxectivos moi claros, onde se traballa moito e onde espero crecer como xogadora”.
A xogadora é consciente de que neste equipo terá un obxectivo distinto ao da tempada anterior en León e comenta que “si. Se que BAXI estivo varios anos en Liga 1 e que busca ascender. Sexa cal for o obxectivo sempre vou dar o 100%”.
En canto ao que pode achegar ao conxunto ferrolán, a bonaerense sinala que “creo que son unha xogadora vertical ao aro e que teño un bo tiro exterior e tamén me deixo a alma en cada defensa. Espero poder axudar ao equipo e render ao nivel esperado”.
Julieta Mungo, xogadora do BAXI Ferrol: “Creo que son unha xogadora vertical ao aro e que teño un bo tiro exterior e tamén me deixo a alma en cada defensa”.
Julieta Mungo convértese na décima integrante do persoal ferrolán para a próxima tempada, tras as renovacións de Patri Cabrera, Natalia Rodríguez, Sune Swart, Patricia Benet, Anniina Aijanen e Dynn Leaupepe e as fichaxes da valenciana Irene Garí, da arxentina Andrea Boquete e da canaria Laura Fernández.
