A sede da Deputación da Coruña acolleu a reunión do xurado dos I premios do Deporte convocados pola institución provincial, unha iniciativa coa que se pretende recoñecer a actividade dos deportistas e entidades máis destacadas da provincia.
O xurado está presidido pola deputada de Deportes, Cristina Capelán, e integrado por profesionais de referencia no eido da información deportiva como Paulo Alonso, xefe de Deportes de La Voz de Galicia; Alberto Torres, director do dxtcampeon.com; María Varela, xornalista de Deportes de La Opinión de A Coruña; Fran Hermida, xefe de Deportes de Radio Coruña-SER e Silvia Carregal, directora de As Nosas, xornal de deporte feminino.
🏆 O xurado xa está a deliberar os resultados dos Premios do Deporte da @Depucoruna! pic.twitter.com/sRuH6MZp1T
— Deputación da Coruña (@Depucoruna) March 6, 2023
O fallo destes primeiros Premios do Deporte Deputación da Coruña darase a coñecer na Gala do Deporte que o organismo provincial organiza o vindeiro 31 de marzo no Teatro Colón da cidade herculina, coa presenza de centos de clubs e persoeiros do ámbito deportivo da provincia.
Unha ducia de galardóns nestes Premios Deputación da Coruña
Os premios do Deporte da Deputación da Coruña contan con 12 categorías:
- Mellor deportista masculino
- Mellor deportista feminina
- Mellor deportista veterano masculino
- Mellor deportista veterana feminina
- Mellor deportista promesa masculino categoría base
- Mellor deportista promesa feminina categoría base
- Mellor deportista con diversidade funcional masculino
- Mellor deportista con diversidade funcional feminina
- Mellor adestrador
- Mellor árbitro/a xuíz/a
- Mellor entidade colaboradora
- Premio a toda unha vida dedicada ao deporte
Ademais, o xurado resérvase o dereito de realizar ata catro mencións, sempre que o considere oportuno, para aquelas persoas ou entidades que desenvolvesen unha actuación no ámbito do deporte digna de ser destacada a nivel provincial.
Os premios consisten nun galardón conmemorativo e un diploma acreditativo, ademais do recoñecemento social que a Deputación promoverá a través dos medios de comunicación e das súas redes sociais.
