O XXXIV Gran Premio Cantones de Marcha é a proba máis importante desta tempada, nun ano marcado polos Xogos Olímpicos. Así o establece o ránking anual da World Athletics, que situou ao torneo coruñés como o máis relevante na edición do 2019. A este campionato acudirá Antía Chamosa como representación galega, despois de competir coa Selección Española na Copa de Europa.
A cita volve á Coruña o vindeiro 5 de xuño, tras o parón obrigado pola COVID-19 que impediu disputar a edición do 2020. Segundo o organismo internacional, o Gran Premio Cantones ten máis importancia na marcha mundial que outras probas como o Campionato de China, o Campionato de Asia ou a propia Copa de Europa.
As protagonistas da carreira feminina no Gran Premio Cantones
Neste torneo continental participou a galega Chamosa, quedando na décima posición e asinando a mellor marca sub23 da historia nos 35 km (2:57.51). A atleta do SG Pontevedra acudirá á Coruña co seu irmán, o tamén marchador Daniel Chamosa.
Cos Chamosa competirán tamén algunhas das atletas máis destacadas do panorama europeo. Á cita acudirá a medallista de bronce no europeo de 35 km, a italiana Lidia Barcella, e a súa compatriota Federica Curiazzy. Como parte do equipo español competirá Laura García, bronce nos 20 km, Raquel González, quen competiu na mesma proba e María Juárez, dos 35 km.
Na proba masculina haberá 80 participantes, o dobre que no campionato continental Entre eles estará o ouro dos 20km en Podebrady, o sueco Perseus Karlstrom. Tamén marcharan os dobre prata e o bronce da mesma distancia Álvaro Martín e Diego García. Ademais, competirá Maro Tur, campión de Europa por equipos nos 50 km.
