A Selección Española de ciclocrós conta con seis deportistas galegos para a disputa do Campionato de Europa. Trátase do segundo ano consecutivo no que se produce esta circunstancia. Catro deses deportistas son mullesres: Laura Mira, María Filgueiras, Aroa Otero e Uxía Soto. De feito, das seis mulleres que compoñen a expeción da Selección Española, catro son galegas. Esta convocatoria, sumada aos éxitos competitivos das ciclistas galegas, confirma que Galicia é unha potencia nesta modalidade ciclista: o ciclocrós.
A lista de ciclistas galegas/os convocados pola Selección Española está composta pola corredora Sub-23 Laura Mira (Supermercados Froiz), o Sub-23 Miguel Rodríguez (Supermercados Froiz), o júnior Tomás Pombo (Padronés-Cortizo) e as juniors Uxía Soto (Supermercados Froiz), María Filgueiras (corredora do XSM que adestra habitualmente co Club BTT Caimanes Betanzos) e Aroa Otero (Supermercados Froiz). Todas elas e todos eles defenderán as cores do combinado estatal esta fin de semana, días 5 e 6 de novembro, no circuíto belga de Namur.
Galicia é a comunidade autómona que conta con maior representación na lista de 17 ciclistas confeccionada polo seleccionador Pascual Momparler, segundo informa a Federación Ciclismo Galego.
O sábado a acción arrancará ás 11:00 horas coa proba junior feminina. Ás 13:15 h. disputarase a carreira Sub-23 masculina, pechando a xornada a cita para as mulleres elite. Xa o domingo os juniors homes abrirán a competición ás 11:00 h., coas mulleres Sub-23 concorrendo ás 13:15 h. e a carreira elite masculina botando o peche ao Campionato desde as 15:00 horas da tarde.
As probas Sub-23 e elite tanto masculinas como femininas poderán seguirse en directo a través de Eurosport Player.
O combinado español, dirixido por Pascual Momparler, brindará a oportunidade nesta nova edición do Europeo a unha extensa nómina de novos talentos, da mesma forma que sucedeu no Europeo 2021, explican desde a Real Federación Española de Ciclismo (RFEC).
Lista completa de ciclistas españois no Europeo de ciclocrós
Felipe Orts será o único representante español na categoría elite. Kevin Suárez, Lucía González, Sofía Rodríguez o Sara Bonillo, tamén convocados para a cita, centrarán os seus esforzos no calendario nacional coa intención de sumar puntos de fronte ao Campionato do Mundo de ciclocrós.
En categoría Sub-23 concorrerán en Namur Laura Mira (galega) e María Módenes, ademais de Javier Zahera, Raúl Mira, Gonzalo Inguanzo e Miguel Rodríguez (galego).
Por último, ata dez juniors viaxarán a Bélxica para seguir acumulando experiencia internacional nunha cita do máis alto nivel do ciclocrós mundial: Carlos Gámez, David Ivars, Tomás Pombo (galego), Hodei Muñoz, Emilio Reinoso, Gorka Corres, Nahia Arana e as galegas María Filgueiras, Uxía Soto e Aroa Otero.
