Unha semana despois do Gran Premio Cidade de Pontevedra, a localidade cántabra de Noja acolleu a terceira cita da Copa de España Féminas Cofidis, onde María Filgueiras foi segunda clasificada, afianzando un terceiro posto na xeral.
Cunhas condicións atmosféricas que nada tiveron que ver coas desfrutadas nas Rías Baixas, a ciclista repetiu resultado na carreira cadete. A galega do Río Miera-Meruelo volveu rematar segunda tras un duelo máis emocionante que o do domingo anterior coa líder invicta Paula Ostiz (Lacturale).
Contra vento e chuvia na terceira xornada da Copa de España
A chuvia e o frío marcaron a cuarta edición do Gran Premio Cantabria Deporte. Nun percorrido para as corredoras cadetes de 31,2 km, a metade da carreira destacaron Filgueiras, Ostiz e Leyre Almena (Hyunday Koryo Car). A segunda clasificada na xeral da Copa cedeu nas ramplas do Alto de San Mamés, quedando a galega e a navarra nun man a man.
Ostiz, que viña de exhibirse cunha galopada en solitario en Pontevedra, tivo que agardar en Noja ata o treito final para asegurarse a vitoria. Nos últimos quilómetros Filgueiras non puido seguirlle o ritmo e cruzou a liña de meta a 13 segundos. Esta actuación permite á ciclista de Betanzos recortar a diferenza na xeral respecto a Almena, que concluíu terceira. Agora están separadas na clasificación da Copa de España por 14 puntos.
Por detrás das tres primeiras, a 1:48 da gañadora, chegou o pelotón cunha galega sacando a relucir a súa punta de velocidade. Segundo informa a Federación Galega de Ciclismo, a coruñesa Lara Fuentes (Cambre Caeiro) fixo segunda no esprint do gran grupo, o que lle outorgou a quinta posición na carreira, mellorando o sétimo posto que lograra en Pontevedra. Un total de 87 cadetes completaron a proba.
Outro resultado sobranceiro para o noso ciclismo asinouno Carla Fernández na carreira raíña. A viguesa do Team Farto-BTC formou parte do selecto grupo que pugnou pola vitoria e clasificouse 13ª, sendo a sexta mellor sub23, a 4″ da vencedora Alba Leonardo (Río Miera). En canto á participación galega na categoría júnior, o mellor resultado acadouno Sonia Domínguez (Team Farto-BTC): 31ª a 10″ da gañadora Lucía Pérez (Río Miera).
A Copa de España feminina regresará o 23 de abril en Balmaseda (Biscaia).
As ciclistas do Club Ciclista Betanzos arrincan a tempada con boas sensacións
Nesta Copa de España tamén están a competir as ciclistas do Club Ciclista Betanzos, con grandes resultados. Na proba pontevedresa o CCB contou con tres deportistas cadetes e unha júnior.
Entre as cadetes, Lucía acadaba o mellor posto das tres, aínda que todas formaron parte do pelotón principal ata o tramo final, no ascenso ao porto. A júnior Andrea foi a segund mellor galega na súa estrea na categoría.
Na xornada en Noja, as ciclistas betanceiras competiron con dúas participantes en cadetes e unha en júnior, que se mantiveron no pelotón, rematando finalmente na zona medias das súas clasificacións.
O club salienta a “gran experiencia que adquiriron as nosas corredoras nestas dúas probas, onde o mellor do pelotón nacional citábase, con parrillas de saída que rondaron as 100 corredoras e que fai sen dúbida que estas probas sexan toda unha masterclass de ciclismo para elas”.
