- Do 16 ao 18 de febreiro Expourense acollerá a celebración do LX Campionato de España de Atletismo Absoluto Short Track.
Esta mañá tivo lugar a presentación do LX Campionato de España de Atletismo Absoluto Short Track que se vai celebrar na “mellor pista de atletismo cuberta de España, a de Expourense”, apuntaba Lete Lasa, secretario xeral para o Deporte. A cita terá lugar do 16 ao 18 de febreiro.
No acto de presentación estiveron tomando parte ademais do citado José Ramón Lete, secretario Xeral para o Deporte; Gonzalo Pérez, o alcalde de Ourense; Ivan Sanmartín, presidente da FGA; Raúl Chapado presidente da RFEA; Rosendo Fernández da Deputacion de Ourense; Manuel Pérez xefe do Servizo Provincial de Deportes e a de Anibal Pereira concelleiro de deportes en Ourense.
No acto, púxose en valor a importancia que a instalación atlética de Expourense ten na organización tanto de campionatos de Galicia como de campionatos de España a través das cales se xenera unha enorme actividade económica e unha non menos importante promoción e proxección do atletismo.
De igual modo destacouse o excelente momento polo que atravesa o atletismo español con figuras mundiais entre as que destaca a presenza das galegas Belén Toimil e Ana Peleteiro, así como a de Adrián Ben entre outros.
Importante presenza de público en Expourense
O campionato recibirá durante os días 16, 17 e 18 de febreiro a presenza de máis de medio milleiro de atletas que se achegarán en representación de preto de cen clubs aos que hai que sumar algo máis de tres mil persoas que en calidade de familiares, técnicos e afeccioados estarán nunha instalación que novamente volve colgar o cartel de billetes esgotados, segundo informa a Federación Galega de Atletismo.
O secretario xeral para o Deporte, José Ramón Lete Lasa, lembrou os oito campionatos nacionais de atletismo celebrados en Ourense dende o nacemento da pista, peor sobre todo, os tres campionatos de España absolutos celebrados en 2020, 2022 e 2024, para asegurar que “os mellores atletas acostumáronse o tartán azul da pista da Xunta que cada dous anos, acolle un campionato de España absoluto”.
🔜 En 15 días, @EXPOURENSE volverá a convertirse en la casa del mejor atletismo 🤩
👉🏼 Primer #CEatletismoST (bajo denominación short track)
👉🏼 Más de 500 atletas de +100 clubes
👉🏼 Tercera edición en Galicia, tras 2020 y 2022, gracias al apoyo de las instituciones: @Xunta,… pic.twitter.com/Pes4xHAnVw
— atletismoRFEA (@atletismoRFEA) January 31, 2024
Nesta ocasión, Lete Lasa destacou os nomes dalgúns dos mellores atletas do mundo que se darán cita en Ourense como Mo Katir, Jordan Díaz, Esther Guerrero, Mariano García, Mario García Romo, Marta Pérez, Jaël Bestué ou Asier Martínez. Pero, especialmente, sinalou aos atletas galegos que se atopan nun excepcional momento de forma nun ano tan importante no que de contado chegaremos ao Mundial de Glasgow, pero sobre todo no que viviremos uns Xogos Olímpicos nos que, de seguro, haberá grandes éxitos galegos.
Deste xeito, Lete Lasa mirou con confianza a participación neste Campionato de España Absoluto de Adrián Ben, Ana Peleteiro, Saleta Fernández, Belén Toimil ou Leticia Gil.
O mandatario galego lembrou que, grazas ao traballo de todos, na última década pasamos de 4.300 licenzas de atletismo en 2012 a preto de 11.000 en 2022. Hoxe Galicia conta con 130 clubs de atletismo repartidos por toda Galicia -45 na Coruña, 17 en Lugo, 23 en Ourense e 45 en Pontevedra- sendo a federación galega con máis clubs tan só por detrás de fútbol, ciclismo, caza, baloncesto e patinaxe. Ademais xa son 75 os atletas recoñecidos pola Xunta en diferentes categorías, e dentro deles son 50 os deportistas galegos de alto nivel de atletismo.
“Adrián Ben, Saleta Fernández, Ana Peleteiro, Ainhoa Repáraz ou Xela Martínez son algúns deles que, ademais, xa bateron récords nesta pista”, engadiu o secretario xeral para o Deporte.
