- O Concello da Coruña utilizará o pavillón do IES Rafael Puga Ramón para actividades deportivas tras a cesión da Deputación coruñesa do recinto.
A alcaldesa da Coruña, Inés Rey, e o presidente da Deputación, Valentín González Formoso, asinaron hoxe venres 14 de maio, un convenio que lle permitirá ao consistorio contar con máis espazos deportivos para se adaptar ás restricións de capacidade derivadas da pandemia.
Con este acordo entre administracións locais, a Deputación da Coruña cédelle ao Concello herculino, até o mes de xuño do ano 2022, o uso do pavillón polideportivo do IES Rafael Puga Ramón para que poida levar a cabo neste espazo as actividades deportivas municipais.
A alcaldesa da Coruña, Inés Rey, e o presidente da Deputación, Valentín González Formoso, asinaron no pazo provincial coruñés o convenio entre ambas as dúas entidades, que aumentará os espazos deportivos que pode usar o Concello da Coruña e que lle permitirá adaptarse ás restricións de capacidade derivadas da pandemia ocasionada pola Covid-19.
Inés Rey agradeceulle á administración provincial a súa colaboración, vontade e axilidade para que as coruñesas e os coruñeses dispoñan de máis recintos deportivos, como o pavillón do IES Rafael Puga Ramón, para usar mentres as restricións de acceso e capacidades vencellas á pandemia de COVID-19 sigan a estar vixentes.
O IES Puga Ramón conta cunha pista cuberta
Este acordo non interferirá no funcionamento habitual do centro educativo Rafael Puga Ramón xa que se establece un horario de ocupación das instalacións de 18.30 a 00.00 horas, de luns a venres, e sen limitación durante a fin de semana sempre que a actividade non resulte incompatible coas do instituto. Ademais, o persoal municipal designado polo Concello encargarase de realizar a limpeza diaria e a desinfección da instalación.
O pavillón polideportivo do IES Rafael Puga Ramón conta cunha pista cuberta que dispón de sinalización con dimensións regulamentarias para a práctica de voleibol, baloncesto, balonmán, fútbol sala e tenis.
