O circuíto de carreiras populares Coruña Corre volve ás rúas da cidade no 2022 trala paréntese da pandemia

O Concello da Coruña recupera para o ano 2022 o calendario de carreiras populares que quedou en suspenso durante os últimos dous anos por mor da pandemia de COVID-19.

O circuíto Coruña Corre volve figurar na axenda municipal de actividades deportivas da Coruña para o vindeiro ano. “Coruña Corre é unha das actividades programadas máis relevantes do ano, con milleiros de participantes en cada edición. Tiñamos moitas ganas de retomar as carreiras populares e por fin podemos volver a elas”, indicou a concelleira de Deportes, Mónica Martínez.

A responsable da área de Deportes no consistorio herculino explicou que a volta do circuíto de carreiras populares era unha prioridade para o Concello da Coruña. “O fomento do deporte popular é unha prioridade para o Goberno de Inés Rey e Coruña Corre é unha das actividades máis valoradas polos e polas deportistas que toman parte nela”, indicou Mónica Martínez.

O programa chega no 2022 á súa novena edición. O prazo de inscrición abrirá nos vindeiros días trala publicación das bases na páxina web do Concello da Coruña.

So 7€ de inscripción para participar nas 7 carreiras se tes Carné Xove

A cota de inscrición para as oito carreiras será de 12 euros, cantidade que se reduce aos 7 euros para persoas que teñan o Carné Xove, xubilados e persoas en situación de desemprego. Quen desexe participar en carreiras illadas, non en todo o circuíto, terá que aboar unha cota de 3 euros por carreira, cantidade que queda en 2 euros nos casos anteriormente citados.

A primeira das citas deportivas terá lugar o vindeiro 23 de xaneiro en Matogrande. Agás no verán, haberá carreiras na cidade durante o resto dos meses do ano.

O circuíto Coruña Corre completa a oferta de grandes citas co atletismo de fondo organizadas polo Concello: a C21 (o 13 de febreiro), a C10 (o 24 de abril) e a Maratón Atlántica e C10 (o 2 de outubro).