A fin de semana vasca da Copa de España comezou o sábado en Llodio con dúas vitorias e outras tres presenzas no podio do ciclocrós galego. A cadete Lorena Patiño (XSM) e a máster-40 Marina González (Illas Cíes) impuxéronse nas súas categorías no histórico circuíto alavés, onde Sarela Conde (Academia Postal-Maceda) obtivo a terceira posición nas juniors e dous representantes da nosa comunidade, Andrés Calvete (Monte Xalo) e Constantino Muñoz (Grupeta Pan de Zarko), escoltaron ao gañador máster-40.
Ver esta publicación en Instagram
A cuarta xornada do certame estatal da Copa de España de ciclocróss contou coa ausencia dos convocados pola Selección Española para o Campionato de Europa da modalidade. Entre eles estaban seis ciclocrosistas de Galicia, catro de categoría feminina e dous de masculina: María Filgueiras, Aroa Otero, Uxía Soto, Laura Mira, Miguel Rodríguez e Tomás Pombo.
O pleno de triunfos da ciclista galega Lorena Patiño continuou no XXXIV Ciclocrós Internacional de Llodio. Invicta tanto na Copa de España de XC como no resto do calendario desta temporada, a líder da xeral cadete avantaxou nesta ocasión á valenciana Leyre Almena (Fundación Teika) en 21″ e terceira finalizou a vasca Nahia García (Café Dromedario), a 1:54 da corredora de Marín.
Entre as dez primeiras corredoras clasificarónse outras dúas ciclistas galegas: Alejandra Neira (Cambre) e Alba Gregores (Ponteareas), sétima e oitava respectivamente.
A verinesa Marina González, vence na categoría Máster-40 nesta proba
A segunda vitoria da expedición galega desprazada ata Euskadi asinouna a vixente campioa estatal máster-40: Marina González.
A verinesa, gañadora no CX Pontevedra a principio de outubro, bateu á líder Ruth Moll (Oviedo.es) por 19″. Na xeral, despois de que a ciclista do Illas Cíes non participara a pasada fin de semana en Les Franqueses, a diferenza a prol da asturiana sitúase en 20 puntos.
Os grupos de idades máster aportaron dous podios máis á colleita galega en Llodio. Na proba máster-40 masculina, Andrés Calvete e Constantino Muñoz protagonizaron un duelo pola segunda praza que se resolveu por 9″ a prol do cambrés. Por diante deles, Isaac Suárez (Nesta) dominou con case 2′ de marxe e con esta vitoria o cántabro amplia a 10 puntos a súa vantaxe no ranking da Copa respecto ao corredor do Monte Xalo.
Dentro do top-10 de corredores, nesta proba meteuse un terceiro representante do noso ciclocrós galego. Trátase de Moisés Leboso (G.D.10), que se adxudicaba en Llodio o posto noveno na clasificación. Por outra banda, Miguel Porto (Ponteareas) rematou oitavo.
A proba da Copa de España de Llodio é un evento C1 no calendario da UCI
A cita alavesa goza do nivel C1 no calendario da Unión Ciclista Internacional (UCI) e compartindo grella de saída con ciclocrosistas estranxeiras que buscaban puntos UCI estivo Sarela Conde na proba Elite-Sub23-Júnior feminina. A de Maceda, 21ª na táboa absoluta, logrou a terceira praza entre as xuvenís e subiu ao caixón xunto á vencedora Marta Cano (Primaflor) e a Natalia Alonso (Bicicletas Meta).
A elite asturiana Lucía González (Nesta) foi a máis forte nesta quenda. En canto á carreira da categoría Elite-Sub23 masculina, o mellor resultado galego correspondeu a Samuel González (Máis Que Bicis) ao cruzar a liña de meta na 12ª posición. O triunfo foi para o ciclista cántabro Kevin Suárez (Nesta).
Este domingo a Copa de España de ciclocróss trasladarase á provincia de Biscaia para a disputa do XXIX Ciclocross Internacional de Karrantza. Nesta ocasión estamos ante un evento depoertivo de clase C2 para a UCI.
