Con soamente dúas derrotas no seu haber, despois de seis partidos, o Celta Zorka Recalvi quere recuperar a boa senda que o mantivo no máis alto da táboa ata a xornada sete. As galegas perderon o seu último encontro cun 73-66 en contra. Agora teñen unha nova oportunidade contra o GDKO Ibaizabal o martes, 17 de novembro, ás 18:00 horas.
Este partido tería que terse disputado na primeira xornada, pero finalmente foi aprazado ata este martes, por un positivo no conxunto vasco. Así, tras a derrota contra o Azkoitia Azpeitia ISB do pasado fin de semana, as galegas deberán disputar outro encontro en terras vascas.
As galegas ocupan agora a cuarta posición da táboa clasificatoria, con dez puntos tras catro vitorias e dúas derrotas. Os bos números das xogadoras celestes víronse truncados no encontro contra o Azpeitia, que comezaron liderando a primeira parte do encontro. Todo cambiou tras o descanso, cando as locais lograrno a remontada e levarse os dous puntos.
No outro lado da pista estará un GDKO Ibaizabal que ven dunha vitoria abultada contra outro galego, o AD Cortegada. As vascas foron superiores durante todo o encontro e venceron con comodidade afundindo ás galegas na parte inferior da clasificación. O Ibaizabal chega ao encontro cun pleno de vitorias, pero soamente catro partidos disputados, o que as sitúa na oitava posición.
As xogadoras do Celta Zorka Recalvi buscan recuperar as boas sensacións
O equipo celeste conta nas súas filas con varias xogadoras que ata a anterior xornada estaban entre as mellor valoradas da Liga Feminina 2. Margarita Davydova e Celia García seguen entre as dez mellor valoradas, pero Maja Stamenkovic cae do top 10. No relativo ás máximas anotadoras, soamente Celia segue entre as dez xogadoras con máis puntos anotados, ocupando a sétima posición.
Así, este martes o Celta Zorka buscará recuperar as boas sensacións que as mantiñan no máis alto das clasificacións e, sobre todo, puntuar, ante un rival que promete ser duro e esixente na súa propia pista.
