O Pescados Rubén Burela FS pecha a primeira volta e 2020 reforzando o liderado do Grupo B (ten 22 puntos fronte aos 17 do segundo clasificado, o Torreblanca Melilla) de Primeira División tras o claro triunfo ante as novel Bodegas Sommos Intersala (6-2).
As campioas de Copa da Raíña regresaron ao mausoleo laranxa de Vista Alegre, demostrando unha vez máis a súa entrega, marcando o compás para non deixar escapar nadiña de nada ao azar e xerando un constante asedio sobre a rede de María de Val. Ale de Paz (minuto 3), a pase de Cilene, Cristina (minuto 16), entre as pernas da meta visitante, e Bea Mateos (minuto 18), asistida por Elena Aragón desde a banda, outorgaron a vantaxe de 3-0 ao descanso.
As pupilas do dúo conformado por Julio Delgado e Lucas non deixaron marxe de manobra, con continuas finalizacións, fronte a un Intersala afanado nunha defensa moi pechada.
Cilene, que xa fixera tremer a rede nun par de ocasións antes do descanso, ampliou a fenda no minuto 23 nun centro de Dany, con Carol na custodia.
O Bodegas Sommos Intersala, con continuas dificultades na zona de elaboración, encaixou o quinto nun contragolpe de Cristina, outra das incisivas da cita, sen opción de repregamento.
A pelexa e a coraxe do equipo visitante atopou a súa recompensa rozando o 30 de xogo nun erro defensivo laranxa, con saída e autopase de Titina que cruzou con Vice para sortear a Sandra Buzón.
Tras a nova aparición de Ale de Paz subindo o 6-1 na caza dun saque de banda maño, o Bodegas Sommos Intersala mitigou a avalancha das Guerreiras Laranxas no 38 nunha contra de Vice, en dobre tentativa sobre Sandra Buzón.
Cun 6-2 mandando no luminoso e certa relaxación defensiva das galegas, o conxunto aragonés pelexou polo terceiro, que desartellaron entre Sandra e Elena na recta final. Vice aínda o tentou cun disparo á escuadra pero aí estaba a meta burelista para desarmalo.
Seguinde reto, a supercopa Burela vs Poio Pescamar
O conxunto mariñán do Pescados Rubén Burela volverá ao parqué o sábado 9 de xaneiro, coa Supercopa de España en xogo ante Poio Pescamar FSF. No Burela avisan que, nese choque, van a por todas e queren revalidar o título.
Cris Pérez e Julio Delgado avisan: “Queremos a Supercopa e imos a por todas ante o Poio”
A seguinte xornada de Liga na Primeira División Feminina do Fútbol Sala español será a décima, xa sen ningún equipo con partidos pendentes de disputar nin no grupo A, nin no grupo B. Arrincando a segunda volta na fin de semana do 17 de xaneiro de 2021. O Burela é líder do grupo B e o Poio é o conxunto galego mellor clasificado no A, ocupando a segunda praza moi preto dun intratable Futsi Atlético Navalcarnero.
No caso do resto dos conxuntos galegos, todos están encadrados no grupo A, e ocupan as seguintes posicións na táboa: Ourense Envialia 5º, Viaxes Amarelle FSF 7º e Cidade de As Burgas 8º. As ourensás conseguiron hoxe o seu primeiro triunfo. Foi ao disputar o partido aprazado (tamén da segunda xornada) contra o CD Leganés FS ao que venceron por 6-2. Deste xeito as de Manolo Codeso acadan tres valiosos puntos de vantaxe co colista, o ascendido AD Club Teldeportivo.
📸La jornada 2 de Primera Femenina #RFEF entre el @burelafs y el @SalaInter en imágenes [6-2].#Burela #Futsal @SomosFutsal #FutsalHeart🧡 pic.twitter.com/23A23srfyk
— Pescados Rubén Burela FS (@burelafs) December 27, 2020
FICHA TÉCNICA
PESCADOS RUBÉN BURELA FS: Sandra Buzón, Dany, Cilene, Ale de Paz, M. Cortés, cinco inicial; tamén xogaron Cristina, Bea Mateos, Elena Aragón, Lara Balseiro, Cami
BODEGAS SOMMOS INTERSALA FS: María de Val, Romero, Vice, Titina, Ana, cinco inicial; tamén xogaron Lucía, Paula, Nerea, Sandra, Carol.
GOLES: 1-0, minuto 3, Ale de Paz; 2-0, minuto 16, Cristina; 3-0, minuto 18, Bea Mateos; 4-0, minuto 23, Cilene; 5-0, minuto 27, Cristina; 5-1, minuto 30, Vice; 6-1, minuto 34, Ale de Paz; 6-2, minuto 38, Vice
ÁRBITROS: Bravo Sarango // Otamendi Lascarro (Navarra).
INCIDENCIAS: Partido correspondente á xornada 2 da Primeira División Feminina da RFEF que foi aprazada no seu día. O cruce foi disputado en Vista Alegre. As Guerreiras Laranxas do Burela ofreceron o trofeo da Copa de S. M. A Raíña á Bancada Laranxa, con corredor de Intersala. O partido foi televisado pola TVG2.