A localidade valenciana de Torrent acolle esta fin de semana a 103ª edición do Campionato de España absoluto ao aire libre. A galega Belén Toimil, vixente campioa de lanzamento de peso, aspira a revalidar o seu título.
A lanzadora de Mugardos mantén hai anos o seu dominio absoluto da modalidade en España sendo a demais a atleta española con mellores resultados no ámbito internacional.
As competidoras de Belén Toimil están lonxe da súa marca
A olímpica galega Belén Toimil atesora tres títulos estatais consecutivos. Ten a súa mellor marca (récord de España) en 18.80m. Nesta tempada ten a súa mellor marca fixada en 18.17m. E se a ela lle custa nalgún momento superar os 18 metros, o certo é que neste momento non hai lanzadora en España que se achegue a esas distancias.
Segundo lembran desde a RFEA, no ano 2023, as únicas atletas que superaron os 14 metros foron a lanzadora de peso “Sub-23 Inés López (15.51 m, 14.99 m), Mónica Borraz (16.07 m, 14.80 m), Judit Prats (14.86 m, 14.65 m) e Eva Cuenca (14.54 m, 14.54 m)”.
As marcas destas grandes deportistas dan conta de por que se fala do dominio absoluto da galega Belén Toimil na modalidade de lanzamento de peso no ámbito estatal.
A competición do Campionato de España absoluto ao aire libre terá lugar ao longo das xornadas do venres 28, sábado 29 e domingo 30 de xullo na Ciutat de l’Esport Parc Central da localidad valenciá de Torrent, un concello que vai converterse no epicentro do atletismo español neses tres días.
Belén Toimil acude a este Campionato de España absoluto ao aire libre defendendo as cores do seu club, o Playas de Castellón que achega a esa competición un total de 79 atletas dos cales 19 teñen opción de subir ao podio. Unha delas, con posibilidade certa de facerse co ouro é a mugardesa. A competición será a que determine se, finalmente, é así e Toimil se confirma por cuarto ano consecutivo como a mellor lanzadora de peso de España.
