O Palau Sant Jordi de Barcelona estivo esta fin de semana cheo de acento galego. Ata nove atletas de Galicia desprazáronse a terras catalás para competir no Campionato Nacional de Pista Cuberta Sub-18. Este estatal impedía a moitas atletas tomar parte no Campionato Absoluto galego que tamén tivo lugar esta fin de semana pero en Expourense.
En liñas xerais, as atletas regresaron a Galicia con grandes resultados, entre os que se atopan varios podios e algún récord de atletismo.
Ainhoa Reparaz, récord galego e Campionato de España
Comezando polo sector de velocidade, Ainhoa Reparaz do Val Miñor volvía novamente a deixar constancia da súa enorme calidade logrando nas series eliminatorias dos 200 metros un rexistro de 24.92 que representaban un novo récord galego para a categoría Sub-18. Un hito que non durou nin un día.
Malia esa boa actuación nas series eliminatorias, a pupila de Óscar Fernández tiña agardado para a final o mellor do día, xa que cunha marca de 24.78 desfacía en menos de seis horas a súa anterior plusmarca galega proclamándose ademáis campioa de España e líder do ránking nacional da súa categoría.
A deportista de Gondomar tomaría parte de igual modo na proba dos 60 m. onde lograba nas semifinais o quinto lugar con 7.89.
Ver esta publicación en Instagram
Medio fondo
No medio fondo a sexta posición nas semis dos 1.500 m. foi para Carolina Santos do Ría Ferrol con 4:58.75. Na outra serie semifinal, oitavo lugar para Marcela Morgado do Trega cun tempo de 5:06.00.
Concurso de altura, broce para Emma Sihuang
A actual campioa galega Sub-18 Emma Sihuang Pérez da Atlética Lucense, conseguía no concurso de altura pasar o listón nos 1.68 metros. Esta marca lle daba a opción de subir ao podio e viaxar de volta a terras de Lugo co metal nacional de bronce pendurado do seu pescozo.
Nese mesmo concurso Carlota Salagado do AF Celta ocupaba posto de finalista logo de saltar colocando o listón nos 1.54 m.
Lanzamento de peso
No concurso de lanzamento de peso Xiana Lago, do Ría Ferrol, quen acudía claramente ca mellor marca das participantes, non puido estar sobre os seus niveis. Porén, foi quen de lanzar ata os 13.84 m., algo afastado dos seus 14.49m. pero que serviron a esta talentosa lanzadora para lograr o subcampionato nacional.
Pentathlon, prata de Lucía Sánchez
Tamén Lucía Sánchez del Valle da Atlética Lucense sería outra das atletas que acadaron subirse ao podio grazas aos seus 3.720 puntos no concurso de pentathlon. Con eles, a atleta lograba unha importante medalla de prata que mellora amplamente o seu quinto lugar do ano pasado.
Triplo salto, ouro e prata galegos con Alba Cuns e Diauo Diallo
Como colofón á participación galega nesta competición, no foso de triplo salto producíase un auténtico man a man entre as dúas mellores atletas do Estado. Tanto Diauo Diallo do Ría Ferrol con 12.65 m., como Alba Cuns, do Playas Castellón, con 12.55 m., acudían cas dúas primeiras posicións do ránking nacional.
A proba que comezou encabezando Alba Cuns conseguindo 12.30 m. no seu primeiro salto. A atleta tivo réplica por parte de Diauo Diallo no cuarto con 12.27 m. Foi novamente a de Negreira quen marchou ata os 12.43 m. no seu salto na seu quinta rolda. Diante desa marca, nada puido facer a ferrolá que remataría sendo prata nun concurso con xenuino e claro acento galego.
Consulta os resultados completos nesta ligazón.
🚺 PODIO – Triple salto
🥇 Alba Cuns 12.43
🥈 Diaou Diallo 12.27
🥉 Andrea Arilla 12.18🗓️ https://t.co/F1cDWhM9g5
📺 https://t.co/zHfz4mOOLU#CEatletismoSub18PC #GeneraciónAtletismo pic.twitter.com/AsMCaOU6U7— atletismoRFEA (@atletismoRFEA) March 13, 2021
