O futuro do CB Arxil pronuciábase con acento canario. A pasada fin de semana as pontevedresas disputaron dous encontros nas illas, que se saldaron cunha derrota ante o colista e rival directo Magec Tías (70-64) e unha vitoria ante o Vega Lagunera Adareva Tenerife (68-70).
Con estes resultados, o Arxil ocupa xa a novena posición da LF2, desmarcándose lixeiramente da zona de descenso, sendo o equipo mellor posicionado da zona baixa. Cos seus 27 puntos empatan co Maristas Coruña, superan por un a Cortegada, ADBA e Rosalía e por tres ao Magec Tías.
Unha de cal
Precisamente este foi o seu primeiro rival do maratón das Canarias, nun partido disputado o pasado venres. As pontevedresas aproveitaron a viaxe para recuperar o encontro adiado da undécima xornada ante o Magec Tías.
Este duelo presentábase como unha data marcada no calendario das verdes, que tiñan que vencer a un rival a priori adquirible, por ser o farolillo vermello da clasificación.
Así comezou tamén o partido, cun Arxil que dominaba na pista como visitante aproveitando o xogo interior, con Forster e María Lago liderando. Porén, o Magec creceuse na súa propia pista e respondía con creces as ofensivas galegas ata situarse por diante. Dous tiros libres de Lago volveron a colocar ás pontevedresas á cabeza, pero por pouco tempo. As canarias aproveitaron os erros rivais para facerse cos rebotes defensivos e aumentar a súa vantaxe.
Cun 22-16 remataba o primeiro cuarto, con marxe para a mellora pero a urxencia de non poder deixar escapar os dous puntos no Arxil. Un problema que non fixo máis que se agravar no segundo parcial. Os tiros entraban para as verdes, pero tamén o facían, e con maior efectividade, no bando local.
Dous triplos seguidos de María Delgado facían aumentar a súa renda sobre as galegas ata os once puntos de diferenza ao momento do descanso (37-26).
Porén, a pausa pareceu activar ás xogadoras de Maite Méndez, que saíron fortes e concentradas á pista canaria. Avanzando a pasos axigantados o Arxil recortaba distancias ata poñerse a un triplo de distancia das anfitrioas. Faltaban 90 segundos para que dera fin o terceiro cuarto cando o equipo local reviviu e deixou o luminoso no 52-45 para o inicio do tempo final.
As verdes aínda tiñan posibilidades de remontar e levarse a vitoria, pero o partido complicábase. Sara Castro anotaba cinco puntos que achegaban a unha canastra de distancia ás galegas, pero a defensa do seu equipo non freaba ao Magec Tías. A adestradora visitante viuse obrigada a solicitar un tempo morto cando o electrónico informaba do 61-54 e xa pasara o ecuador do cuarto.
Tras o seu discurso Díaz-Pache e Carla Fernández foron as autoras dun parcial 0-5 que mantiña o resultado aberto, polo que desta vez foi o técnico rival o que tivo que parar o tempo.
O duelo estaba completamente igualado e as canastras de Masía e Díaz-Pache tiñan resposta no acerto de Regina Gómez. Calquera podía resultar vencedor, pero foi un tiro de tres de María Delgado a 20 segundos do final o que determinou o partido para as locais.
Cun 70-64 rematou o encontro das verdes e as colistas, que precisaban vencer no seu segundo reto canario para facer bo o desprazamento ata as illas.
Consulta nesta ligazón as estatísticas do encontro.
E outra de area
E este trunfo chegou sorprendentemente dous días despois, no duelo da 21ª xornada ante o Adareva. O Arxil non padeceu o cansancio acumulado pola viaxe e a derrota consumada o venres e foi quen de loitar por un partido vital para a súa permanencia na categoría.
De novo, Forster foi fundamental no xogo interior visitante, apoiada polos triplos de Natalia López, que marcaban o ritmo do inicio do duelo. Desta forma, as de Méndez lograron rematar o primeiro cuarto cunha vantaxe que resultaría esencial para a vitoria posterior (11-16).
Esta renda seguiu aumentando co seguinte cuarto, cun partido xa máis igualado, pero que mantiña ás verdes por riba. O segundo parcial comezou cun 14-10 a favor das canarias a causa dun impaciente Arxil que cometía erros. Porén, María Lago asinou un triplo que revivía ao seu conxunto. As vedes reaccionaron e consegueron tamén levase este segundo tempo. O marcador informaba xa do 27-34 ao descanso.
O equipo local, sétimo na clasificación, tiña fame de revancha e así o demostrou no inicio da segunda parte. Natalia López e María Lago anotaban para o Arxil cun parcial 0-5 que facía reaccionar ás canarias. Estas responderon aproveitando os erros visitantes, recortando distancias e tomando pouco a pouco o control do partido.
O duelo complicábase para un club pontevedrés que perdía a súa capitá. Lago tivo que abandoar a pista por problemas na súa perna esquerda, deixando ao Arxil sen unha das súas pezas fundamentais. A feble defensa galega non podía aguantar máis ao Adareva, que cun triplo no último momento poñía o 53-56 a falta dos dez minutos finais.
O último cuarto converteuse nun man a man polo trunfo, con opcións para ambos equipos e unha igualdade máxima sobre a cancha. Por primeira vez, o Adareva situábase á cabeza, pero cunha vantaxe dun solitario punto que o Arxil foi capaz de resolver. Porén, isto non foi ata a última xogada, na que Forster salvou ao seu equipo cun triplo que sentenciou o partido (68-70).
Podes consultar nesta ligazón as estatísticas do partido.
A odisea do Arxil nas Canarias
Viaxar en tempos de COVID non é nada doado e o Arxil viviuno en primeira persoa a pasada semana. Para chegar a Tenerife, as pontevedresas tiveron que coller dous vóos, algo que non tería sido un inconveniente de non ser pola pandemia.
O club pontevedrés relata que o avión que viaxou de Vigo a Madrid “estaba completo no seu aforo, sen distancia de seguridade e con pasaxeiros quitándose a máscara”. Unha escena que se repetiu no trasbordo en Madrid.
Xa en Tenerife os problemas seguiron crecendo. O Arxil non puido facer uso dos vestiarios do Magec Tías, polo que tiveron que cambiarse nun almacén e ducharse xa de volta no hotel, a 40 km.
Para o regreso, as verdes tiveron que facer fronte á meteoroloxía. Viaxando desde Madrid a Pontevedra en dúas furgonetas, o club sufriu malas condicións meteorolóxicas de chuvia e neve regresando a casa ás 06:00 horas da mañá.
