O Viaxes Amarelle FSF recibía a un loitador Bloques Cando FSF Castro, que apuraba as súas opcións de entrar no play-off con este enfrontamento directo. Pero o conxunto coruñés disputou un partido moi serio, e a pesar da igualdade e pelexa dos dous equipos sobre a pista, conseguía sumar unha importante vitoria por un marcador de 4-2, grazas aos goles de Patri Romaní, Cris Lourés, Èlia Gullí e Candela Soria.

O partido empezaba cun Viaxes Amarelle FSF querendo mandar sobre a cancha, exercendo unha presión moi alta de balón e buscando a portería contraria para poder adiantarse canto antes no marcador. Enfronte tiña un rival moi ben posicionado e que trataba de crear perigo coa velocidade das súas xogadoras. Con todo, o primeiro gol chegaría para a escuadra local, cando Patri Romaní recupera un balón en media cancha e combina con Candela Soria, para finalizar o gol desde o segundo pau, Patri Romaní a pracer.
A escuadra laranxa adiantábase no marcador, e seguía buscando ampliar a renda no marcador; pero a falta de oito minutos para o tempo de asueto, Lara rouba un balón e vaise en velocidade á contra, e no un para un con Leti Rojo, pon as táboas no marcador (1-1).
Pese ao gol das lucenses, as locais non baixaron o ritmo, e seguiron xerando ocasións sobre a portería rival, tendo algunhas moi claras para poder volver adiantarse, pero o gol facíase de rogar. A falta de 40 segundos para o final do primeiro tempo, chegaría unha cesión da escuadra visitante e consecuente falta indirecta ao bordo da área. Pediu tempo morto Jorge Basanta e tirou de estratexia, no regreso á pista esa estratexia deseñada sobre a lousa polo adestrador das locais convértese en gol. Sube así o 2-1 ao marcador, tras finalización de Cris Lourés.
Na continuación, o Viaxes Amarelle FSF empezaba con máis ganas que nunca, e quería abrir distancia no marcador, e nunha bonita transición do equipo, Èlia Gullí recibe para un disparo exterior, co que bate a Area e sobe o 3-1 ao marcador aos 49 segundos. Pese ao rápido gol da escuadra laranxa, o Bloques Cando FSF Castro, tamén reaccionaba rápido ao gol e poñía o 3-2 apenas uns segundos máis tarde, cun novo tanto de Lara.
Aínda quedaba toda a segunda parte por diante, e o Viaxes Amarelle FSF non facía máis que buscar o gol da tranquilidade, pero este facíase esperar; pero a falta de algo menos dos dez minutos para o final do partido, Candela Soria recibe un balón en longo e vaise do seu par, para cun potente disparo exterior poñer o 4-2 no marcador. Aínda partira por diante, e as herculinas seguían pelexando por ampliar distancias, mentres que as visitantes trataban de recortar distancias por todos os medios, aínda que sen fortuna, grazas a unha excelente defensa herculina e unha boa actuación en portería de Leti Rojo.
O últimos tres minutos foron para un Bloques FSF Castro que tentou recortar distancias co xogo de cinco; pero un moi bo Viaxes Amarelle FSF evitou que apenas puidesen chegar ao minuto de xogo efectivo con xogo de cinco; e manter desta maneira a vantaxe no marcador co 4-2 conseguido.
Vitoria importantísima para o conxunto herculino que se vai ao parón da próxima fin de semana, con motivo da disputa da Copa de SM A Raíña de Fútbol sala, a só dous puntos de certificar matematicamente o título de campión de liga no grupo 1 da Segunda División do Futsal Feminino da RFEF, cando restan nove puntos por disputarse.
Seguinte rival do Amarelle, o CD Uni Salamanca
Tras este novo partido oficial da tempada, o equipo coruñés regresa aos adestramentos este próximo luns e seguirá coa normalidade de adestramentos, a pesar de non ter encontro a disputar a próxima fin de semana; e tratar de manter unha forma óptima para este tramo final de competición.
O encontro correspondente á vixésimo cuarta xornada da Segunda RFEF Futsal Feminina, terá lugar o sábado 14 de maio de 2022 no Pavillón Universitario Miguel Unamuno (Salamanca) ás 17:00 horas, visitando ao CD Uni. Salamanca.

FICHA TÉCNICA
4) VIAXES AMARELLE FSF: Leti Rojo, Cris Lourés, Lau Doce, Yaiza, Candela Soria (cinco inicial), Patri Romaní, Èlia Gullí, Carlita, María Gómez, Irune Santesteban, Khrystyna Stepanenko, Daryna Tkachenko, Sandra.
2) BLOQUES CANDO FSF CASTRO: Area, Ana, Lara, Antía, Patri Corral (cinco inicial), Sainza, Verónica, Andrea, María, Elvira, Aroa, Irene, Tami Gándara.
GOLES: 1-0 Patri Romaní (min. 5); 1-1 Lara (min. 12); 2-1 Cris Lourés (min. 19); 3-1 Èlia Gullí (min. 21); 3-2 Lara (min. 21); 4-2 Candela Soria (min. 30).
EQUIPO ARBITRAL: Roberto Segundo Amor Vizoso e Alejandra Bujía Piñeiro-Varela del Comité Técnico de Árbitros de Ferrol. Mesa: Roberto Pena Porta do Comité Técnico de Árbitros de Ferrol. Amonestaron a Area e Antía do Bloques Cando FSF Castro con cartón amarelo.
INCIDENCIAS: Partido correspondente á vixésimo terceira xornada do Grupo 1 da Segunda División RFEF Futsal Feminino disputado no pavillón Municipal da Sagrada Familia na Coruña).