Este mércores, 26 de maio, da comezo o Preolímpico de Graz, no que a Selección Española 3×3 competirá por un billete a Toquio 2021. O equipo ten a posibiliade de ser o terceiro representando a España nos Xogos Olímpicos deste verán nesta importante cita, que será retransmitida por LaLigaSportstv.
A seleccionadora Anna Junyer ten a seis xogadoras inscritas en FIBA á súa disposición, das que poderá escoller catro ata o último momento: Sandra Ygueravide, Aitana Cuevas, Paula Palomares, a galega Marta Canella, a ex xogadora do Ensino Vega Gimeno, e a nova fichaxe do club lucense Georgina Bahí.
Ademais, dúas xogadoras estiveron preparando a competición co equipo nos adestramentos: Gracia Alonso e a alero do Ensino Helena Oma. O corpo técnico está formado pola preparadora física María Reina, o médico Vicente Sebastià e os fisioterapeutas Ana López e Josep Galán, ademais da xa mencionada seleccionadora Anna Junyer.
O formato do Preolímpico de Graz
Dos vinte equipos que competirán neste campionato, só tres acadarán o billete olímpico. A Selección Española do 3×3 forma parte do Grupo D, no que competirá contra Italia, China Taipei, Suíza e Austria. As transalpinas, campioas do mundo no 2018, serán o primeiro rival das vermellas, este mércores, ás 17:15 horas.
A seguinte proba será contra Suíza, uns minutos despois, ás 18:55 horas. Despois dun día de descanso, as españolas competirán o venres contra China Taipei ás 19:20 horas e contra Austria ás 20:35 horas.
Os dous primeiros clasificados de cada grupo pasarán aos cuartos de final, onde os mellores do D xogarán contra os dous mellores do B, un grupo formado por Australia, Ucraína, Xapón, Irán e Tailandia. De entre os catro semifinalistas sairán as tres prazas para Toquio 2021.
Na outra parte do Preolímpico de Graz atópanse equipos potentes como Estados Unidos, Francia, Hungría e Países Baixos. En Toquio estarán xa Rusia, China, Romanía e Mongolia. A outra praza disputarase nun Qualifying para países que non participaron na competición de baloncesto dos Xogos Olímpicos.
Unha preparación de 10 para o 3×3
Despois de case dous anos sen competir, o equipo do 3×3 voltou por todo o alto. Antes de disputar o Preolímpico de Graz, a Selección Española tivo varias xornadas de preparación, nas cales disputou o Women’s Series de Mies e Vorion, cun balance de oito vitorias e dúas derrotas. As españolas foron primeiras na cidade suíza e segundas na localidade francesa.
No primeiro torneo, as vermellas acadaron un pleno de vitorias, vencendo a seleccións xa clasificadas para os Xogos Olímpicos e superando a outras rivais no Preolímpico. España chegaba con tres vitorias da primeira fase, polo que acadou o pase directo a semifinais.
Nas portas da final, a Selección do 3×3 xogaron de maneira inmpecable, coa galega Marta Canella especialmente inspirada nos tiros afastados e na defensa coa ex do Ensino Vega Gimeno. Neste partido, as españolas superaron a Rusia, un equipo que xa ten o billete para Toquio 2021.
Na final agardaba Polonia, un óso duro de roer para as de Junyer. Nos primeiros compases as polacas poñíanse por diante, pero finalmente as vermellas impuxeron o seu xogo, vencendo na final cun axustado 19-17. Así, a Selección Española acadou o seu primeiro título do Women’s Series.
No seguinte torneo, as vermellas atoparon a un rival da súa altura: Francia. As galas triunfaron na final, pero antes diso, as españolas derrotaron a Canadá na primeira fase, a Países Baixos nos cuartos de final cun gran partido de Marta Canella, e á Selección U25 rusa na semifinal cun triplo de Vega Gimeno.
Na final, a Selección Española 3×3 non puido superar ás anfitrioas, superiores no aspecto físico e apostando por un ritmo alto de xogo que provocou erros nas filas vermellas. Cun 13-22 final, as de Junyer proclamáronse subcampioas.
