A Coruña acollerá esta fin de semana a edición número 24 do Trofeo Teresa Herrera de Judo, un dos campionatos máis importantes dos que se realizan en Galicia desta disciplina e clasificador para a fase final do Campionato de España. A concelleira de Deportes, do Concello da Coruña, Mónica Martínez presentou o torneo xunto a Mario Muzas e Eduardo Galán, presidente e vicepresidente da Federación Galega de Judo, respectivamente.
Na competición participarán deportistas de catro comunidades autónomas: Galicia, Asturias, Cantabria e Castela e León. Cóntase coa presenza duns 120 judokas nas categorías masculina e feminina.
Entrada de balde neste Teresa Herrera de Judo
O XXIV Trofeo Teresa Herrera comenzará ás 9.30 horas do domingo 20 de novembro, e as finais están previstas para as 12.30 horas do propio domingo, e a entrega dos trofeos arredor das 13.30 horas. A asistencia será gratuíta para o público.
A concelleira de Deportes, do Concello da Coruña, Mónica Martínez, destacou a presenza nesta 24ª edición do Teresa Herrera de Judo dos e das mellores judokas do noroeste de España na cidade como mostra do impulso levado a cabo desde o Goberno municipal polo deporte federativo. Así mesmo, agradeceu á Federación Galega de Judo o seu labor e interese por continuar a desenvolver na Coruña unha proba con tanto renome.
