O Concello da Coruña organiza, xunto coa Federación Galega de Judo, a edición número XXV do Trofeo Teresa Herrera de Judo. A competición celebrarase este domingo, 12 de novembro, no polideportivo municipal do Barrio das Flores.
Desde o Concello da Coruña explican que con accións coma esta afianzan a súa “aposta polo deporte e polas competicións autonómicas e nacionais de máximo nivel, tendo o judo un gran protagonismo en diferentes eventos nos que colabora o Concello ao longo do ano”.
No torneo deste domingo participarán un cento de judokas representando ás comunidades autónomas de Asturias, Cantabria, Castela e León e Galicia. A competición deste XXV Trofeo Teresa Herrera de Judo comezará ás 9.30 horas e as finais están previstas para as 12.00 horas. O Teresa Herrera de Judo forma parte do sector oeste do Campionato de España Absoluto 2023.
Galicia, unha das favoritas deste Teresa Herrera de Judo
Galicia é unha das federación favoritas para obter un maior número de prazas na fase final nacional, que se celebrará o 2 de decembro en Pamplona. Trátase da comunidade con maior representación, coa participación de 32 homes e 21 mulleres. O equipo galego, ademais, conta con 11 deportistas disputando o circuíto internacional e que están clasificados directos para a fase final.
Á competición deste Trofeo Teresa Herrera de Judo poderase asistir de maneira gratuíta ata completar capacidade. Ademais, o campionato será retransmitido en directo pola canle de YouTube da Federación Galega de Judo.
