A AD Cortegada despide unha tempada en Liga Feminina 2 con boas sensacións e traxectoria ascendente. Despois de estar en perigo de descender, as galegas afianzaron a salvación e coa última vitoria ante a ADBA (53-49), rematan na novena posición.
Neste último partido, celebrado en Fontecarmoa ante as colistas, a xogadora máis destacada foi Patricia Vicente, con 31 créditos de valoración por 18 puntos e 18 rebotes.
O Cortegada foi de máis a menos
Co factor casa ao seu favor, as xogadoras do AD Cortegada saíron fortes á súa pista. Cun primeiro parcial ao seu favor dun 7-4, as galegas seguiron aumentando a súa vantaxe malia os balóns perdidos e sendo superior no tiro libre e baixo o aro. O primeiro cuarto remataría no 16-10 dándolle a superioridade ás locais.
No segundo tempo, o poder equilibrouse entre ambos equipos, en parte pola efectividade do Agrupación Deportiva Baloncesto Avilés (ADBA) desde a liña de tres, dun 31,3% neste tempo. O primeiro parcial deste tempo foi precisamente para as visitantes, que alarmaban ás galegas, pero aínda non eran capaces de poñerse por riba.
Antes do descanso, as asturianas seguiron presionando, ante un Cortegada sen ideas e lonxe do acerto do primeiro cuarto. Porén, a vantaxe conseguida nos primeiros minutos e unha defensa que impedía que as visitantes se desmarcasen, deixaba o marcador no 24-19 á pausa.
A vantaxe da primeira parte salvou ás galegas
Tras o descanso, as de Vilagarcía de Arousa recuperáronse e saltaron á pista coas enerxías renovadas. Tamén o fixeron as rivais, polo que o terceiro cuarto comezou como un pulso entre os dous conxuntos. Co paso dos minutos, o Cortegada lograba distanciarse, tirando dos tiros de dous e aproveitando as perdas de balón da ADBA. O último cuarto chegaba co 41-34.
O resultado aínda estaba aberto, pero as galegas non perderon en ningún momento o seu liderado e así o mantiveron ata o final. De novo, o cadro visitante presionaba e achegábase perigosamente ás de Nogueira, pero estas controlaban xa todos os aspectos do xogo. Así, o partido remataría nun axustado 53-49, pero cunha xusta vitoria para a AD Cortegada.
FICHA TÉCNICA
53) AD CORTEGADA: Vicente (18), Loureiro (2), Presas (5), Gómez (9), Sedlakova (7) – quinteto inicial -. Tamén xogaron: Castro (3), García (-), Ríos (-), Montenefro (-) e Wanyama (4).
49) ADBA: Barbosa (13), De Sousa (16), Fraile (8), Martínez (3), López Sagrera (-) – quinteto inicial -. Tamén xogaron: Guimaraes (5), López Cuesta (3), Dias (1), Velasco (-).
PARCIAIS: 16-10, 8-9, 17-15 e 12-15.
ÁRBITROS: Trasancos e Díaz.
INCIDENCIAS: Partido correspondiente á 26ª xornada do Grupo A da Liga Femenina 2 disputado no pavillón de Fontecarmoa en Vilagarcía de Arousa.
