O Ulla Oil Rosalía non logrou dar a sorpresa ante o Celta Zorka Recalvi, pero case. Na primeira parte, as xogadoras de Chiqui Barros lograron tratar de ti a ti a un dos grandes da LF2, pero para a segunda metade, as de Cristina Cantero dominaron o partido (46-64).
Así, as celestes lograron a undécima vitoria esta tempada, o que as sitúa na quinta posición da táboa, a dous puntos do Osés Construcción Ardoi e a catro do BAXI Ferrol.
Chiqui Barros (adestrador do Rosalía): “Cando unha defensa te axuda e non es capaz de anotar, pois deixas de botar no saco algo que vas necesitar”
Por parte local, o xogo do Rosalía estivo desequilibrado entre defensa e ataque. “Fixemos un gran traballo con pouco acerto. Fíxolles dano ou cambiou o ritmo do partido a zona que fixemos moi ben durante moito tempo, pero cando unha defensa te axuda e non es capaz de anotar, pois deixas de botar no saco algo que vas necesitar”, analizaba Barros.
Unha primeira metade igualada
O equipo dirixido por Chiqui Barros, xogando de local, soubo atoparlle o punto ao Celta nos primeiros minutos. Cunha defensa zonal, as xogadoras celestes tardaron en chegar ao aro rival, marcando a primeira canastra a tres minutos e medio do inicio.
Con todo, a acertada defensa do Rosalía non se equiparaba ao seu ataque, polo que o cadro visitante logrou adiantarse cun parcial 0-6 grazas á actuación da pívot Leticia Soares. O técnico compostelán solicitou unha pausa e o seu plantel reaccionou, con dous triples seguidos de Ángela González que logrou reducir a distancia coas viguesas.
Os fallos desde os tiros de 2 por parte das compostelás compensáronse co seu acerto desde a liña de tres e desde o tiro libre e, sobre todo, por unha sólida defensa. Desta maneira, o primeiro cuarto remataba case en empate, cun 11-14.
Para o seguinte tempo, a igualdade non fixo máis que aumentar. Oito puntos consecutivos das locais obrigaron a Cristina Cantero a pedir un tempo morto e recolocar ás celestes ao ver como as rivais se adiantaban no marcador. A resposta das visitantes non se fixo esperar e volveron a adiantarse no marcador, empatando o segundo cuarto, pero cunha vantaxe de tres puntos ao descanso (25-28).
O Rosalía non aguantou o ritmo tras o descanso
O paso por vestiarios rompeu a dinámica das de Santiago e non souberon xa manter o ritmo do Celta. As visitantes deron coa clave para superar a defensa zonal das locais e asinaron un parcial 0-8 da man de Marita Davydova.
Entón, o equipo de Barros cambiou a unha defensa individual, pero por parte das celestes, Celia García asinou dous triples que, xunto ao acerto de Rose Marie Julien, lograron a maior diferenza no partido (27-44).
Ángela González (Rosalía): “Fixemos un mal terceiro cuarto, no que non entraba nada e sacaronnos unha vantaxe bastante grande”
“Fixemos un mal terceiro cuarto, no que non entraba nada e sacaronnos unha vantaxe bastante grande que conseguimos remontar un pouco pero non para chegar ata o final”, analizaba no postpartido a branca Ángela González.
A falta de dez minutos, as compostelás foron quen de reencontrarse co seu acerto fronte ao aro, cun parcial 5-0 que deixaba aberto o resultado a falta dun cuarto.
No último tempo, o Rosalía comezaba recortando distancias, sen chegar a alcanzar ás súas rivais. Unha serie de faltas deixaba ás celestes descolocadas, situación que aproveitaron as locais para situarse a nove puntos.
Con todo, o Celta Zorka Recalvi non se viu abaixo e reaccionou con triples de Clara Prieto e Julien, retomando a tranquilidade no banco visitante. Pero as xogadoras de branco non remataran a faena e asinaron un gran parcial 9-1 que as mantiña no xogo.
A tres minutos do final, o partido non estaba decidido, pero Cristina Cantero soubo reorganizar ao seu plantel para dominar o xogo. Davydova e Stamenkovic lograron un parcial 0-11 amarrando a undécima vitoria celeste.
“Houbo un momento no tramo final de coraxe, intensidade, traballo e creo que cunha defensa individual espectacular por momentos. Tivemos a nosa opción pero cando se dan esas circunstancias moitas veces chegas tan desgastada que non podes máis”, explicaba o técnico compostelán sobre a derrota.
O Rosalía acumula a quinta derrota consecutiva que, de todas formas, non baixa os ánimos no club. “Felicitar ao Celta pola extraordinaria tempada que están facendo. Nós a seguir traballando porque con esta intensidade, o acerto será mellor outro día e seguiremos tendo opcións de gañar partidos e de conseguir o obxectivo”, declaraba Chiqui Barros.
FICHA TÉCNICA
46) ULLA OIL ROSALÍA: Sara Corredoira (8), Alba Rama (-), Sarai Carro (2), Carla García (3) e Leticia Soares (6)-cinco inicial-. Tamén xogaron: Paula Rivas (1), Nuria Chorén (-), Blanca Manivesa (6), Angela González (15), Clara Riera (-) e Nerea Liste (6).
64) CELTA ZORKA RECALVI: Mariona Martín (-), Lucía Fontela (2), Celia García (9), Maja Stamenkovic (13) e Marita Davydova (20) -cinco inicial-. Tamén xogaron: Noa Comesaña (-), Florencia Niski (-), Clara Prieto (7) Angela Coello (2) e Rose Marie Julien (11).
PARCIAIS: 11-14, 14-14, 7-16 e 14-20.
ÁRBITROS: Roi Rilo Antelo e Andrés Estebán Domínguez. Sinalaron un total de 15 faltas a Ulla Oil Rosalía e 18 a Celta Zorka Recalvi.
INCIDENCIAS: Partido correspondente á 15ª xornada da Liga Feminina 2 disputado no Instituto Rosalía de Santiago de Compostela ante 50 persoas.
