Tres centenares de riders converteron á Estación de Montaña de Manzaneda na capital do ciclismo de descenso estatal durante a fin de semana. Dez bikers galegos subiron ao podio.
O II Mini DH Manzaneda Bike Park e o V Trofeo Federación DHI – Manzaneda Bike Park, dous eventos organizados pola Federación Ciclismo Galego (FCG), ofreceron espectáculo e emocións fortes nas instalacións do complexo turístico ourensá. A cita da Copa de España encargouse de baixar o pano do seu calendario con dez representantes da nosa comunidade asinando postos de podio.
A cuarta e última xornada do circuíto de probas coordinado pola Real Federación Española de Ciclismo (RFEC) disputouse o domingo e reuniu a 180 participantes.
O mellor rexistro da final correspondeu a Édgar Carballo (Vadebicis), que detivo o reloxo en 2:17,902. O canario bateu por 2,5 segundos ao vasco Yelco Romero (Baskonia), ambos da categoría elite-sub23, e o terceiro posto scratch logrouno o júnior madrileño Daniel Castellanos (Planet MTB), a 3,5″ do gañador absoluto.
O quinto rider máis rápido entre os 180 participantes foi o galego Francisco Vilaboa (Singletrack) (cunha marca de 2:23,492). Esta actuación outorgoulle o terceiro chanzo do caixón elite-sub23 ao rematar xusto por diante do madrileño Orion Kirchmayer (101% DH), que chegaba como líder da xeral e certificou o título en Manzaneda.
Entre os dez primeiros da categoría raíña masculina metéronse outros dous corredores da nosa autonomía: Kevin Méndez (Rocasport Giant) fixo sexto e Marco Veiga (CiclosQuintena), noveno.
#CopaEspañaDH | Todo preparado para unha gran fin de semana de Descenso no Manzaneda Bike Park
👍👍 Víctor Picos, director da @Manzaneda_EM, e Alberto del Río, director do dobre evento organizado pola Federación Ciclismo Galego
🔗 https://t.co/SxvXDOmpUH pic.twitter.com/H6To8bc9Bn
— F_Galega de Ciclismo (@F_Gal_Ciclismo) July 21, 2023
Nos dous grupos de idade de promesas os galegos estiveron implicados na loita por ser terceiros. Rubén Temprano (Komanche) conseguiuno nos cadetes, superando a Xurxo Campos (Monteneme) e a Yerai Peláez (Coruxo), cuarto e quinto respectivamente. Ás portas do podio, concretamente a menos de 1″, quedou André Martínez (Avanza-O Porriño) nos juniors. Clasificouse cuarto, un posto por riba de Héctor Quinteiro (Pontebike).
En canto ás categorías Máster, Iván Mourelo (DH Galicia) impúxose nos máster-30 levándose o man a man co andaluz Moisés Navarrete (Enduriders), vencedor da Copa de España. A camisola do certame estatal tamén a luciu o catalán Manel Arasa (Or Bikes) nos máster-40, o rider ao que escoltaron Miguel Ángel Pintos (Coruxo), segundo clasificado a 2,2″ do gañador, e José Montenegro (Moto Bike), terceiro a 2,5″ do primeiro posto.
Unha situación similar deuse nos máster-50. O valenciano Jacobo Santana (BMX Alcoy), líder da Copa, marcou o mellor tempo por diante de dous galegos. Rebaixou en 13,7″ o rexistro de Ricardo Escudero (Poio Bike) en 14,7″ o de Adolfo Gallego (Singletrack).
Tres podios femininos galegos no descenso en Manzaneda
Os tres podios femininos do noso Descenso tiveron premio dobre. Arantxa Gómez (OsdoSacho) e Alexia Santervas (A Forna), segunda e terceira cadete respectivamente, ascenderon a esas mesmas prazas na xeral da Copa de España, dominada pola triunfadora en Manzaneda, a andaluza Laura Márquez (Planet MTB).
Directamente no máis alto do ranking do seu grupo de idade irrompeu Lorena Castro (VigoEnduro) grazas ao seu triunfo nas máster-30.
A condición de raíña scratch da xornada acadouna por segundo ano consecutivo a madrileña Zoe Zamora (101% DH), que afrontou esta proba co título Elite Sub-23 da Copa no peto. A gañadora do Trofeo Federación DHI – Manzaneda Bike Park no 2022 dobregou nesta ocasión por 1,8″ á asturiana Cristina Menéndez (Cuetos Bike), tamén Elite Sub-23, e por algo menos de 4″ á júnior Kira Zamora (Zamora (101% DH). Gemma Chapela (VK Bikes), a mellor galega Elite Sub-23, terminou quinta na súa categoría, seguida por outras tres riders da nosa comunidade como son Uxía Álvarez (Coruxo) (sexta), Desiree Fernández (Ribadumia) (sétima) e Alejandra Chapela (VK Bikes) (oitava).
A cerimonia de clausura deste evento e, a súa vez, da Copa de España 2023 contou coa presenza de Víctor Picos, director da Estación de Montaña de Manzaneda; de Patricia Domínguez, alcaldesa da Pobra de Trives; de Antonio Núñez, tenente alcalde de Manzaneda; de Fermín Santoveña, concelleiro de Deportes da Pobra de Trives; e de Juan Carlos Muñiz e de David Carrillo, presidente e secretario da FCG.
Mini DH Manzaneda Bike Park
O programa desta fin de semana de Descenso na Serra de Queixa arrancara o sábado coa segunda edición do Mini DH Manzaneda Bike Park. Cun total de 120 inscritos celebrouse a segunda proba do calendario autonómico desta especialidade do BTT para as categorías de Escolas.
As rapazas e os rapaces alevíns e infantís que queiran volver desfrutar no Manzaneda Bike Park da man da FCG poderán facelo do 4 ao 6 de agosto no Campus Mini DH Ciclismo Galego by Eva Castro, segundo informa a Federación Ciclismo Galego.
