A alcaldesa da Coruña, Inés Rey, e a concelleira de Deportes do citado municipio, Mónica Martínez, visitaron as obras do complexo deportivo do Castrillón que avanzan a bo ritmo cuxa xestión correrá a cargo de EMVSA (Empresa Municipal Vivienda, Servicios y Actividades S.A.U.). O barrio estreará en 2021 a infraestrutura deportiva.
A rexedora coruñesa destacou que con esta actuación en marcha se acaba unha loita veciñal de anos tras a paralización do proxecto, “unha xestión 100% municipal, o que garantirá que os prezos sexan asequibles e que demostra o noso compromiso coa humanización dos barrios”.
Deste xeito o barrio coruñés do Castrillón contará o ano que vén cun complexo deportivo que ademais do elemento principal que é piscina, contará con spa, ximnasio e unha pista, unha obra valorada en 1.964.205,24 euros, que se completará co equipamento deportivo oportuno. Por importe de 249.525,77 euros, o orzamento incluirá unha liña de cardio e de forza, xogo de porterías de balonmán, xogo de voleibol e de bádminton e un conxunto de bancadas retráctiles.
Cunha superficie de 3.060,45 metros cadrados, o edificio terá dúas plantas e o baixo. A primeira planta, con 2.340,60 m², albergará a piscina, o spa (pediluvio, sauna de vapor, sauna seca, ducha escocesa, ducha biotérmica, ducha cubo, ducha tres estacións), a pista polideportiva, aseos adaptados e vestiarios para monitoras/es e persoas usuarias.
A segunda planta, de 571,75 m², incluirá os vestiarios para mulleres e homes e as salas de actividade deportiva.
