Vigo reunirá esta fin de semana a deportistas galegos e de fóra de Galicia que practican breaking. A cidade galega acolle dúas probas: o Break Storming – Trofeo Xacobeo 21-22’ e a última xornada da Liga Galega de Breaking.
O sábado 18 de decembro será tempo do ‘Break Storming – Trofeo Xacobeo 21-22’, unha cita promovida pola Secretaría Xeral para o Deporte. Celebrarase de 10,00 a 14,00 horas para as categorías Sub-18 e de 16,00 a 21,00 horas para a categoría Absoluta. Esta competición é unha proba puntuable para o ranking estatal e espérase unha alta participación tanto de deportistas galegos como doutros practicantes de breaking achegados desde diferentes puntos da península.
Mañá, domingo 19 de decembro, en horario de 16,00 a 21,00 horas, Vigo será a última etapa da Liga Galega de Breaking. A competición contou cun total de 62 participantes nas súas dúas categorías – iniciación e avanzada -, sendo o 57% dos participantes da categoría de iniciación unha participación feminina.
O secretario xeral para o Deporte, José Ramón Lete Lasa destacou a xuventude dos participantes as figuras de Alicia Babarro, que con dez anos é a primeira no ranking de iniciación sen perder unha batalla, e de David Amor, que con 14, é terceiro no ranking de categoría avanzada.
Lete Lasa: “A Liga Xunta de Breaking é importante para situar a Galicia na vangarda das novas expresións deportivas, fidelizar á xuventude e fortalecer a práctica mixta e feminina”
Na presentación destas dúas probas, que se celebrou na Casa do Deporte, José Ramón Lete Lasa destacou a importancia dunha disciplina como o breaking, que xa foi recoñecida como especialidade deportiva en Galicia o pasado mes de marzo, procedéndose despois á constitución da Liga Xunta de Galicia de Breaking, da man da Dirección Xeral de Xuventude, Participación e Voluntariado que conta con 10 competicións en distintas localidades galegas.
Para o secretario xeral, o deporte galego debe camiñar da man das demandas dos mozos e mozas que practican actividade física, polo que sinalou que os deportes urbanos están a ter unha grande repercusión nos últimos anos. Tanto é así que o break dance será deporte olímpico en París 2024 xunto ao basket 3×3, a escalada ou o skate.
Lete Lasa lembrou a decidida aposta da Xunta de Galicia polo Marisquiño, que este ano aumentou os seus esforzos nun 70% ata chegar aos 200.000 euros e tamén asegurou que o éxito desta Liga Xunta de Galicia de Breaking será o acicate perfecto para o Plan Director de Deportes Urbanos de Galicia do que asegurou ser importante para “situar a Galicia na vangarda destas novas expresións deportivas, así como fidelizar á xuventude ou fortalecer a práctica mixta e feminina”.
Na presentación tamén participaron o xerente de Vella Escola -produtora dos eventos- Pablo Castiñeira e o bailarín de breaking e xurado dos eventos, Francisco Javier Meana que realizou unha exhibición.