- As instalacións da pista do barrio da Sagrada Familia na Coruña melloráronse recentemente co puído da superficie para acondicionar a zona de xogo e o repintado do peche exterior metálico
A pista multideporte da Sagrada Familia, onde o Concello da Coruña concretou traballos de mellora e reacondicionamento das instalacións a finais de xullo, acolleu o acto de recepción a Carlos Martínez, José Blázquez, José Santonja e Ion Galarza, catro deportistas integrados no top-10 nacional da disciplina do baloncesto 3×3 cos que puideron gozar nenas e nenos da cidade.
A concelleira de Deportes, Mónica Martínez, acompañada pola concelleira de Comercio, Mercados e Barrios, Diana Sobral Cabanas, recibiu na Sagrada Familia aos catro deportistas, integrantes do equipo Onil 3×3 e puxo en valor a súa traxectoria.
Carlos Martínez, coruñés, é o número un do ranking nacional da Federación Internacional de Baloncesto (FIBA) na modalidade 3×3, e representou á Selección Española en categoría absoluta nesta disciplina, ao igual que José Blázquez. Pola súa banda, José Santonja e Ion Galarza xa foron convocados a unha preselección do combinado nacional absoluto.
Neste sentido, as nenas e nenos pertencentes aos campamentos deportivos municipais puideron gozar coa exhibición de Martínez, Blázquez, Santonja e Galarza, que amosaron as súas habilidades nas zonas de baloncesto 3×3 recentemente habilitadas na pista multideporte do barrio. Mónica Martínez subliñou o compromiso do Goberno municipal de Inés Rey “para potenciar e mellorar as infraestruturas deportivas da cidade”, achegando tamén aos máis pequenos “a unha disciplina deportiva en auxe que, ademais, contribúe a fomentar hábitos saudables e valores como o traballo en equipo”.
Así foi a renovación da pista multideporte da Sagrada Familia
A finais de xullo, o Concello da Coruña completou os traballos de mellora en tres pistas multideporte do termo municipal, Mazaído (Bens), praza da Tolerancia (Labañou) e Sagrada Familia, co fin de acondicionar as instalacións deportivas para as persoas usuarias.
No caso da pista multideporte do barrio da Sagrada Familia executáronse traballos de puído da superficie para acondicionar a zona de xogo e de repintado do peche exterior metálico. Ademais, pintáronse unha pista de fútbol sala e catro zonas de baloncesto 3×3, así como a zona de bancadas e muros, despois dunha limpeza integral do espazo.
As mesas de xogo e canastras resituáronse de acordo cos traballos de pintura realizados, reconfigurando o espazo deportivo para unha mellora na actividade das persoas usuarias.
