O Maristas Coruña respira e alónxase da zona de descenso da Liga Feminina 2. Despois de encadear dúas derrotas consecutivas, o equipo coruñés precisaba unha vitoria. Máis aínda tendo en conta o rival, un Magec Tías “Contra la Violencia de Género” que se perfila como un rival directo e que chegaba ao encontro igualado en puntos, con oito.
O encontro comezou decantándose do lado visitante, cunha superioridade das canarias que facía temer o peor para as galegas. Con todo, as xogadoras do Maristas déronlle a volta ao partido e leváronse os dous puntos tras triunfar na segunda parte.
O primeiro cuarto foi dominado totalmente polo Magec Tías, que se impoñía con boas xogadas de ataque que lles permitiron adiantarse no marcador. O seu acerto fronte a canasta funcionaba ata desde a liña de tres, con dous triples seguidos do Magec. A baixa da galega Regina Gómez non foi un problemas para as visitantes, que asinaron un 18-22 no primeiro tempo que foi crecendo en contra das coruñesas ata chegar ao 33-42 ao tempo de descanso.
A remontada comezou á volta de vestiarios, cun Maristas tocado pero non afundido e decidido a loitar polo partido. O terceiro cuarto foi clave para a confianza das galegas, que comezaron a sumar máis puntos para o seu marcador. Con todo, a falta dos dez minutos finais, as xogadoras dirixidas por Jorge Carreira aínda perdían de cinco puntos.
Non foi ata a canasta de Joana Pereira cando as coruñesas se adiantaron no marcador. A partir de entón, as locais non deixaron escapar a vitoria e lograron sumar os dous puntos cun 80-76 final.
FICHA TÉCNICA
80) MARISTAS: Joana Cristina Pereira (20), Laura Martínez (-), María Cortés (2), Eugenia Filgueira (24), Laura Cervelo (13) – quinteto inicial -. Tamén xogaron: Marina Feijóo (-), Beatriz Sanz (1), Elena Pedrosa (5), Tatiana Casal (5), Ariadna González (2) e Andrea Pérez (8).
76) MAGEC TÍAS CONTRA LA VIOLENCIA DE GÉNERO: Iranzu Drake (9), Samira Olano (7), Carolina Mateo (24), Andrea Rodríguez (1), Esperanza Delgado (19) -cinco inicial-. Tamén xogaron: Daniela Bercedo (10), Natalia García (4), Noelia Lago (2) e Mikela Riolo (-).
PARCIAIS: 18-22, 15-20, 21-17 e 26-17.
ÁRBITROS: Laura Piñeiro e Adrián Álvarez.
INCIDENCIAS: Partido correspondente á oitava xornada da Liga Feminina 2 disputado no colexio Maristas de A Coruña.
