A alcaldesa da Coruña, Inés Rey, anunciou onte que na Xunta de Goberno Local (XGL) se aprobaron investivementos en instalacións deportivas na Coruña como son o skate park e pista multideporte de José Toubes, outra pista de skate en Eirís, así como o acondicionamento dos vestiarios, campo de fútbol de herba artificial e peche perimetral do Campo de Fútbol de Eirís
Na última XGL de 2022 no Concello da Coruña mobilizouse un investimentos por 14 millóns de euros repartidos en diferentes actuacións e áreas. “Esta XGL exemplifica o traballo de xestión que está a levar a cabo este Goberno, contribuíndo desde o público a facer unha cidade mellor e con mellores servizos. Ese é o camiño que levamos percorrendo neste mandato e así seguiremos tamén no 2023″, explicou a alcaldesa.
Entre os investimentos aprobados destacan tres equipamentos deportivos por valor de máis de dous millóns de euros. A adxudicación das obras do skate park, multideportes e reurbanización da praza de José Toubes, unha nova infraestrutura que se situará baixo o viaduto da avenida de Alfonso Molina e que inclúe a urbanización do conxunto da praza e amplía o anterior proxecto, que só incluía a pista de skate.
Neste caso, haberá un skate park máis completo e construirase tamén unha pista multideporte, que quedarán integrados na contorna mediante a adecuación do firme de todo o conxunto. A actuación ten un orzamento de 450.000 euros e un prazo de execución de 4 meses e está cofinanciada con Fondos Eidus.
Ademais, a actuación contempla unha mellora da accesibilidade na zona. Reformaranse as beirarrúas e habilitarase un novo paso de viandantes na rúa Fernando Rey con rede semafórica e crearase tamén unha praza peonil como zona de tránsito e encontro, con novos espazos verdes e mobiliario.
Skate park en Eirís e obras no campo de fútbol
Aprobouse tamén a contratación das obras da nova pista de skate no parque de Eirís, que conta cun orzamento de 525.000 euros.
Esta infraestrutura deportiva terá dous espazos principais tal e como demandaban os usuarios e usuarias (un bowl e unha skateplaza), adaptando a instalación a outros deportes urbanos como a patinaxe, BMX e patinetes. Ademais crearase un paseo peonil con bancos, fonte e aparcabicis en paralelo ao bowl e na parte central haberá un xardín que actuará como espazo separador entre ambas as zonas.
Aprobouse, ademais, a adxudicación das obras incluídas para o acondicionamento dos vestiarios, campo de fútbol de herba artificial e peche perimetral do Campo de Fútbol de Eirís. O valor do contrato ascende a 1,9 millóns e foi adxudicouse a Construcciones López Cao. As obras executaranse nun prazo de 8 meses.
Por outra banda, tamén foi aprobada na XGL a compensación ao Club do Mar con 52.807 euros para axudar á entidade no mantemento da piscina, contribuíndo ao seu reequilibrio económico.