O Clúster da Industria do Deporte e do Benestar de Galicia pretende ser un espazo no que as empresas poidan asociarse para proporcionar recursos, capacidades, competencias, medios, formación e asesoramento ao amplo sector relacionado co ámbito deportivo.
Na súa carta de presentación expoñen que o ano 2020 “foi un ano extraordinariamente negativo para o noso sector e para os profesionais que nel estamos. A COVID-19 provocou consecuencias especialmente negativas nun sector no que o contacto, o grupo e o movemento son algunhas das súas características esenciais”.
Neste recentemente creado Clúster da Industria do Deporte e do Benestar de Galicia plantexan que “debido a que somos un sector moi novo aínda non dispoñemos de ningunha agrupación para estar presentes e poñer os intereses e potencial do noso sector enriba da mesa”.
Reunión do Clúster con Lete Lasa
Hai pouco, o secretario xeral para o Deporte, José Ramón Lete Lasa, mantivo unha xuntanza de traballo coa xunta directiva do Clúster da Industria do Deporte e do Benestar de Galicia, tras a súa recente constitución neste pasado mes de xaneiro.
Nesta xuntanza, Lete Lasa destacou que “Galicia é líder a nivel nacional en canto a crecemento da participación cidadá na práctica deportiva, especialmente nas zonas rurais” xa que actualmente se estima que case un 40% da poboación galega practica deporte habitualmente.
Desde a Secretaría Xeral para o Deporte lembran que o sector deportivo galego conta na actualidade “cun ecosistema de máis de 2.000 empresas que xeran un volume de actividade superior aos 1.600 millóns de euros e 12.000 postos de traballo, sendo moitas das empresas do sector líderes nacionais na súa especialidade, e estando algunhas delas empezando xa o seu proxecto internacional”.
Desde o Clúster da Industria do Deporte e do Benestar de Galicia refréndanse esas cifras para o sector e afírmase que supón o 2,5% do PIB galego, que xera máis de 12.000 postos de traballo e acubilla a máis de 2.000 empresas. Sosteñen que 1.400.000 persoas practican deporte en Galicia de xeito regular, contando con 286.000 deportistas federadas/os e máis de 5.300 clubs deportivos.
Destácase tamén desde o Clúster o feito de que desde a Asociación Deporte Español (ADESP) e a Fundación España Activa, se aseguraba xa no ano 2.000 que a investigación tiña demostrado “de forma contundente e indiscutible” que a práctica deportiva é “un instrumento clave de promoción e prevención da saúde, de aforro en custos socio-sanitarios e de activación social e económica”.
Lete Lasa fala de: “Grandes expectativas de crecemento do sector”
Outra cuestión a ter en conta, tal e como apuntan desde a Xunta é que “Galicia conta ademais cun relevante número de infraestruturas deportivas das que se estima participan máis dun millón de persoas”. Todos estes datos, dixo o secretario xeral para o Deporte, avalan “grandes expectativas de crecemento para as próximas décadas”.
Debido a aparición da pandemia de COVID-19 e a redución do volume de actividade do sector, que en Galicia podería chegar a uns 500 e 600 millóns de euros de perda e a destrución de entre 4.000 e 4.500 postos de traballo, “é importante poñer en marcha iniciativas no territorio dirixidas á reactivación e recuperación dun sector tan consolidado como o do deporte en Galicia”.
Deste xeito, para a Secretaría Xeral para o Deporte da Xunta de Galicia, os obxectivos do Clúster da Industria do Deporte e do Benestar de Galicia “serán impulsar a posta en marcha de servizos innovadores, de calidade e sostibles; deseñar grandes proxectos sectoriais; fomentar a transferencia de coñecemento; propiciar a colaboración público-privada e a posta en marcha de instrumentos de financiamento; crear postos de traballo; fomentar a captación de investimentos; favorecer a internacionalización; proporcionar recursos, formación e asesoramento: así como fomentar hábitos saudables”.
Expectativas do Clúster
Logo do golpe que a crise sanitaria supuxo no sector económico vencellado ao deporte, desde o Clúster da Industria do Deporte e do Benestar de Galicia sosteñen que neste ano 2021 “parece que por fin se concretan os anunciados proxectos públicos para relanzar a economía. Destaca en especial a iniciativa Next Generation, que canalizará dende Europa a España 140.000.000.000 €”.
Explican que é unha iniciativa “baseada en impulsar a economía do futuro e, sen dúbida, o noso sector está ben situado polas súas características intrínsecas. As grandes directrices que se están publicando, e que van marcando as bases polas que se rexerán, apuntan a que as agrupacións sectoriais terán grande relevancia neste proceso”.
En definitiva o Clúster da Industria do Deporte e do Benestar de Galicia é dun espazo no que as empresas asociaranse para proporcionar recursos, capacidades, competencias, medios, formación e asesoramento ao amplo sector relacionado co ámbito deportivo.
Plan do Clúster para o ano 2021
Desde Clúster da Industria do Deporte e do Benestar de Galicia propoñen un plan a seis meses nos cales esperan acadar diferentes obxectivos:
- Presentar proposta á Xunta de Galicia para o recoñecemento do Clúster Galego da Industria Deporte e o Benestar.
- Dotar ao clúster dun equipo profesional, especialmente preparado para canalizar, informar e axudar aos membros do clúster e a todo o sector de cara a presentar proxectos aos fondos Next Generation.
- Lanzamento dun plan que sirva para unir a toda a industria do sector coa creación de grupos de traballo subsectoriais que axuden a defender e impulsar a súa parcela e demostren a amplitude, dimensión e impacto do noso sector se nos agrupamos: a industria do turismo deportivo, industria do equipamento deportivo, industria do textil deportivo, industria da alimentación deportiva, industria da arquitectura e enxeñaría para o deporte, industria do software deportivo, industria dos xestores de instalacións, industria náutica, industria dos eventos deportivos, a industria do mantemento e aforro enerxético….
Desde este colectivo calculan uns seis meses para acadar estas metas e logo teñen previsto convocar eleccións para que un “equipo directivo presente e lidere un plan a tres anos”, anuncian.
Entre as empresas que figuran como socios honorarios do Clúster figuran BeOne, Fit4B, AQA, Termaria, Maside, Salvar, ACID, Padel Prix, DOS (Deporte Ocio Salud) Softee, ou Rocfit, entre doutras.