Vigo foi o escenario do II encontro da Liga Iberdrola de Clubes de Primera División, polo que o Atletismo Femenino Celta competiu en casa e a sorte estivo do seu lado. Tampouco tivo que desprazarse moito a Sociedad Gimnástica de Pontevedra, que porén rematou en peor posición. As viguesas foron segundas e as pontevedresas terceiras, quedando por detrás do Tenerife CajaCanarias, campión da proba.
O cuadrangular da fin de semana converteuse nun triangular pola ausencia do CA Silla, diminuíndo a competición en Balaídos. O club local sumou os tres puntos da segunda posición, tras acadar 207 puntos ao longo da competición. Pola súa parte, as pontevedresas quedaron un tanto descolgadas, chegando só aos 177 puntos, e rematando polo tanto como últimas da xornada. A primeira posición foi para as canarias, que acadaron unha puntuación de 246.
As galegas do Celta e a SG Pontevedra rondan a metade da táboa
Tras estes resultados, o club vigués do Atletismo Femenino Celta queda na décima posición da clasificación xeral de clubs, con catro puntos debido a unha peor primeira xornada. Desta forma, as olívicas competirán pola permanencia partindo como as terceiras mellor clasificadas. En total, oito clubs loitarán por evitar as dúas prazas do descenso.
Algo mellor queda a SG Pontevedra, situada na sétima posición, a última da salvación. As pontevedresas quedan así dentro dos postos de honra, con cinco puntos, e salvadas pola súa mellor actuación da primeira xornada. Agora competirán na fase de ascenso.
Os resultados
O Atletismo Femenino Celta chegou á primeira posición no triplo salto, con Uxía Paz, nunha proba na que as celestes repetiron no podio cunha prata de Ariadna Gil. Tamén acadou un ouro María Pena na xavelina, repetindo medalla cunha prata de Paula Piñon. O terceiro ouro foi o de Mar Chillon, nos 5000m marcha, mentres que nos 100m extra Nayr Cortegoso, Martina Vázquez e Cristina Estévez ocuparon a primeira, segunda e terceira posición respectivamente.
Pola súa banda, a SG Pontevedra obtivo ouros nos 400m con Eugenia Gil, e na mesma proba Irene Barbe quedou terceira, e nos 1500m con Iria Rodríguez, o club sumou outro ouro.
Consulta aquí o listado completo de resultados:
