Galicia contará con tres representantes no Campionato de Europa de campo a través que se desenvolverá na localidade italiana de Turín o vindeiro día 11 de novembro. Trátase de Antía Castro, Inés Docampo e Adrián Ben.
En concreto o atleta olímpico Adrián Ben repite convocatoria logo das súas intervencións nos anos 2016 en Chía (Italia) sendo Sub-20 e no 2018 en Tilburg (NED) xa na categoría Sub-23. Desta vez estrearase na categoría absoluta deste Campionato de Europa de campo a través na modalidade de remudas mixtas xunto a atleta Solange Pereira, Jesús Gómez e Rosalia Tárrega.
Na categoría Sub-20 feminina Galicia contará con dobre participación galega. En Turín estarán as atletas Antía Castro do Ourense Atletismo e Inés Docampo do ADAS CUPRA. Ambas as dúas integrarán unha selección de atletas que a maiores estará formada polas deportistas: María Forero, Iraia Mendia, Marta Serrano e María Viciosa.
Con esta convocatoria, as ourensás debutan nun europeo de campo a través logo do excelente comezo de tempada efectuada por ambas no que lograban impoñerse nas prestixiosas edicións de Alcobendas e de Itálica, logrando de igual modo, uns excelentes resultados en Atapuerca.
A lista de deportistas españois que están preseleccionados para competir no Campionato de Europa de campo a través de Turín é a seguinte:
- Absoluto feminino: Naima Ait Alibou, Isabel Barreiro, Marta García, Águeda Marqués, Carolina Robles e Irene Sánchez-Escribano.
- Absoluto masculino: Roberto Alaiz, Nassim Hassaous, Mohamed Katir, Carlos Mayo, Abdessamad Oukhelfen e Sergio Paniagua.
- Remudas mixta: Adrián Ben, Jesús Gómez, Solange Pereira y Rosalía Tárraga.
- Sub-23 feminino: Alicia Berzosa, María González, Carmen Riaño, Laura Rodríguez, Andrea Romero e Ángela Viciosa.
- Sub-23 masculino: Miguel Baidal, Adrià Ceballos, Aarón las Heras, Àdam Maijó, Miguel Ángel Martínez Chazarra e Pol Oriach.
- Sub-20 feminino: Antía Castro, Inés Docampo, María Forero, Iraia Mendia, Marta Serrano e María Viciosa.
- Sub-20 masculino: David Cantero, Eric Loré, Jaime Migallón, Mario Monreal, Ronaldo Olivo e Aleix Vives.
Galicia, sempre presente no campo a través
Con esta presencia galega na selección nacional de campo a través, Galicia continúa aportando efectivos nas distintas edicións internacionais importantes da modalidade.
Lembramos que os resultados máis salientables ata o momento foron os colleitados pola deportista Julia Vaquero quen lograba nas edicións dos anos 1994 e 1996 o subcampionato continental así como o bronce por equipos no ano 1997.
Nos homes segue sendo a mítica figura de Alejando Gómez quen segue estando ao fronte dos mellores galegos da historia nuns europeos de campo a través. No seu haber, un subcampionato individual no ano 1995 e catro medallas por equipos ( tres ouros no 1995,2001,2002 e unha prata no 1994)
