- A iniciativa canalízase a través do Plan Trail50, que pretende en tres anos a creación dunha rede de 50 instalacións permanentes en España, acreditadas pola RFEA, e convertelas en destinos de referencia para a práctica deste deporte.
- Haberá tres modalidades, adaptadas a diferentes niveis, para os que o Concello de Cariño xa conta con tres propostas de itinerario que pasarán por lugares como Cabo Ortegal, o Miradoiro da Miranda ou os cantiis de Vixía de Herbeira.
O Concello de Cariño foi seleccionado pola Real Federación Española de Atletismo (RFEA) como o único centro de Trail Running para a provincia da Coruña e pasa a formar parte así da rede estatal de instalacións permanentes de Trail Running creada pola RFEA e Trail Running Center, que conta xa con 22 localizacións, repartidas por diferentes provincias.
Polo que respecta a Galicia, até o de agora so funciona o de Folgoso do Caurel, na Serra do Caurel en Lugo, pero nesta tanda de cinco novos centros, a Federación estatal de Atletismo sumou a instalación de Cariño, nas Rías Altas, e o centro de Castro Caldelas na zona da Ribeira Sacra ourensá. Ambos os dous figuran en construción.
Así, as cinco novas provincias que se suman ao proxecto e que contarán cun Trail Running Center son: Ourense (Castro Caldelas), Huesca (Borau), A Coruña (Cariño), Burgos (Regumiel de la Sierra) e Soria.
As instalacións permanentes de Trail Running (TRC) permiten aos seus usuarios adestrar sen masificacións, e practicar este deporte de forma segura, con tres rutas adaptadas a diferentes niveis de dificultade e que deben ter entre 5 e 10 quilómetros, de 10 a 15 quilómetros e de 20 a 25 quilómetros, respectivamente. Estas distancias son orientativas e, no caso do tres itinerarios propostos polo Concello de Cariño, aumentarán no tres modalidades.
Antes de poder activarse como centros de Trail Running os tres itinerarios de Cariño deben acondicionarse e prepararse coa supervisión dos organizadores. Ademais, habilitarase unha instalación municipal como centro de recepción de visitantes, instalarase a sinalización oficial do circuíto e tamén haberá outro tipo de indicadores que destacasen os diferentes elementos de valor patrimonial, naturais ou paisaxístico que poden apreciarse dentro das rutas.
En Cariño queren conxugar deporte e turismo
O obxectivo do goberno local de Cariño é conxugar o fomento do deporte coa promoción turística e é por iso que se pretende que o tres rutas pasen por lugares paisajísticamente relevantes como poden ser Cabo Ortegal, o Miradoiro da Miranda ou os cantiis de Vixía de Herveira.
E é que no contexto sanitario actual, e tendo en conta o auxe do Trail Running, este tipo de instalacións turístico-deportivas son un mecanismo moi útil tanto para promocionar actividades saudables como para reactivar a economía fomentando o turismo.
Plan Trail50 da RFEA
Esta iniciativa canalízase a través do Plan Trail50, que pretende en tres anos a creación dunha rede de 50 instalacións permanentes de Trail Running (TRC) en España, acreditadas pola RFEA, e convertelas nos destinos de referencia en España para a práctica non competitiva deste deporte. De todos os xeitos desde a Real Federación Española de Atletismo preténdese que, de cara a un futuro no que se volvan a reactivar as competicións, estes circuítos poidan acoller probas oficiais da modalidade.
O alcalde de Cariño, José Miguel Alonso Pumar, quixo agradecer á RFEA “que escollesen Cariño como centro de Trail Running xa que o noso obxectivo é seguir sendo un municipio referente no que se refire a actividades deportivas ao aire libre” e lembrou que “aquí xa se celebraron diferentes probas como o mundial de orientación, varias probas ciclistas de diferentes niveis e fomos o concello máis pequeno de España en albergar o campionato de España de Media Maratón en 2019 grazas á boa relación que hai coa Federación Española de Atletismo”.
