A alcaldesa Inés Rey visitou este mércores as instalacións da Cidade Deportiva Arsenio Iglesias para comprobar o estado dos traballos de renovación dos campos, nos que se instalaron un total de 19.968 metros cadrados de céspede artificial. Está previsto que o Concello da Coruña recepcione a obra a finais da actual semana. Unha das principais peticións era que os campos estivesen homologados para acoller competicións estatais de rugby. Iso abriría as portas a que clubs como o CRAT xogasen neles. Desde o Concello da Coruña confírmase que o campo 2 cumplirá eses requisitos.
Os traballos para renovar o céspede artificial de 4 dos 5 campos multideportivos das instalacións da Torre contaron cun orzamento total de 982.069,88 €, IVE incluído. A actuación consistiu na substitución do céspede artificial dos campos, a renovación do sistema de rega e a homologación do campo número 2 para, ademais do fútbol, poder acoller competicións estatais de rugby.
Tratábase dunha demanda dos clubs de rugby da cidade, que pedían unhas instalacións adecuadas para a práctica deste deporte. En canto á rega, o sistema é perimetral mediante canóns de rega emerxentes. Deste xeito mellórase o uso dos terreos de xogo, xa que se suprimiron os aspersores dentro dos campos.
Inés Rey destacou a alta calidade destas instalacións polas que cada mes pasan case 20.000 persoas. “Estamos ante unha Cidade Deportiva de primeiro nivel nacional. Estes campos, situados nun lugar privilexiado aos pés da nosa Torre, permitirán aos clubs da cidade desenvolver os seus adestramentos e partidos nun céspede de última xeración grazas a esta actuación”, afirmou Inés Rey, que destacou a aposta do seu Goberno municipal polo fomento do deporte a través da renovación das diferentes instalacións de titularidade local, para as que se destinaron case 4,5 millóns de euros.
Inés Rey, alcaldesa da Coruña: “Estamos ante unha Cidade Deportiva de primeiro nivel nacional. Estes campos, situados nun lugar privilexiado aos pés da nosa Torre, permitirán aos clubs da cidade desenvolver os seus adestramentos e partidos nun céspede de última xeración grazas a esta actuación”
A Cidade Deportiva da Torre acolle a clubs de fútbol, rugby, gaélico, hoquei e freesbee entre doutras modalidades
Os campos da Cidade Deportiva Arsenio Iglesias son utilizados por unhas 45 entidades da cidade, entre clubs de fútbol, rugby, fútbol gaélico, hoquei sobre herba e freesbee, entre outros deportes. Empréganse tamén para actividades das federacións de fútbol e hoquei e acoller partidos de ligas de asociación de afeccionados e empresas.
Inés Rey, alcaldesa da Coruña: “Por esta Cidade Deportiva pasaron moitas xeracións de coruñeses e coruñesas. É nosa a obriga que poidan seguir a facelo nunhas instalacións modernas e seguras”
A alcaldesa, Inés Rey, destacou o papel que teñen estes campos entre a mocidade e o deporte base da cidade. “Por esta Cidade Deportiva pasaron moitas xeracións de coruñeses e coruñesas. É nosa a obriga que poidan seguir a facelo nunhas instalacións modernas e seguras”, dixo.
