- O atletismo gañou en número de licencias nos último lustro en Galicia.
Son moitos os clubs galegos de atletismo que nos últimos anos se están a ver na obriga de colgar o cartel de “non hai prazas dispoñibles” como consecuencia da gran demanda existente principalmente nas categorías base e máster. Este importante incremento de licenzas vense producindo de maneira moi significativa nos últimos cinco anos, malia que sería a partir do ano 2009 cando daba comezo esta progresión que fixo que se pechara o ano 2021 cun récord histórico de 10.142 licenzas (4.506 mulleres e 5.636 homes).
Todo este aumento obrigou a un considerable incremento de recursos e medios que trouxo consigo a lóxica aparición dun importante número de novos clubs cuxa tarefa consistiría, ademáis da promoción e dinamización, na atención e acollida de todas esas novas solicitudes. Producto de todo elo, foi o espectacular crecemento no estamento de clubs cuxo número na tempada do 2021 pasaba xa das 150 entidades.
O incremento tanto do número de atletas como de clubs, segundo a Federación Galega de Atletismo “evidencia un salientable grao de evolución do atletismo galego que consigue con estos índices que o 75% da poboación galega teña polo menos un club de atletismo no seu concello de residencia. É de salientar o avance producido nos últimos anos xa que tan só no ano 2018 a cifra era dun 65%, dez puntos menos”.
Capítulo especial merece o apartado do podestrismo xa que o auxe desta modalidade na nosa comunidade, (cabe reseñar que de media nos últimos anos se están a producir un total de 65.000 licenzas de día) está favorecendo que se produza un importante e interesante movemento dos seus practicantes que nun porcentaxe destacado, mudan a súa condición de popular pola de atleta federado na procura de ampliar a oferta competitiva e poder tomar parte nas probas federadas de campo a través, trail ou pista.
Medran máis as categorías de atletismo máster e Sub-10
En cifras, o maior número de altas rexistradas no 2021 corresponderon á categoría máster con 1.911 fichas tramitadas sendo a Sub-10 con 1.444 quen ocupa o segundo lugar da relación. Pola súa contra a categoría Sub-23 con 268 é a que representa un menor crecemento do número de licenzas.
