Ata tres galegas acudiron ao Open de Sofía de taekwondo, rematando cun balance de dúas medallas. Alma Pérez colgouse o ouro, mentres que Tania Castiñeira rematou en terceira posición. Pola súa banda, Arlet Ortiz quedou ás portas do podio, rematando a súa competición nos cuiartos.
Alma Pérez (-53, Suh Sport) fixo cinco combates para acadar o título do Open de Sofía. No primeiro combate enfrontouse a unha descoñecida Elif Stoyanov (Austria), á que superou con claridade (0-17). A continuación esperaba a romanesa Liana Musteata, unha competidora cun gran curriculum subcampioa de Europa e reserva no preolímpico europeo), pero outra vez Alma estivo a un gran nivel e venceu por 3-1.
Segundo narra a Federación Galega de Taekwondo na súa crónica, nos cuartos de final a galega venceu a Daniela Souza (México) por 3-7, e así logrou a clasificación para as semifinais. Na semi enfrontouse a Laura Rodríguez, de Castela a Mancha, que é a súa rival directa en España e foi unha loita moi axustada que rematou con empate (3-3) e que se decidiu no punto de ouro a favor da nosa deportista. A final no Open de Sofía foi contra outra mexicana Fabiola Villegas e volveron ofrecer un combate moi axustado que se decidiu, igual que a semifinal, no punto de ouro a favor de Alma.
O bronce foi para a nosa Tania Castiñeira (+73, Hebe) que superou o primeiro combate contra a serbia Tepavac, nun axustado 2-1. En semifinais, enfrontouse a cabeza de serie número 1, a polaca Kowalczuk. A galega tratou de ser moi ofensiva para contrarrestar á polaca, pero non puido puntuar e caeu por 2-0.
Arlet Ortiz (-57, Mat’s) gañou no primeiro combate a Amina Hammich (Noruega) con claridade (1-10) e no segundo superou a Nadja Tesic (Serbia), unha taekwondista que estaba a conseguir moi bos resultados.
Arlet fixo un gran combate e venceu por 1-11. Nos cuartos de final caeu ante a canadense Skylar Park, medallista mundial, número 4 do ranking mundial e que foi a que se proclamou finalmente campioa do Open de Sofía.
Tamén competiron, en categoría masculina, Iván García, que se proclamou campión no peso pesado, e Pablo Patiño, quen caeu nos cuartos de final.
