A Selección Galega de atletismo acudiu ao Campionato de España de Seleccións Autonómicas de probas combinadas con catro atletas e co obxectivo de mellorar os resultados da última edición, celebrada no 2019. Nesta tempada, no torneo disputado en Murcia, o conxunto da FGA foi quen de superar a quinta posición e entrar no podio, colgándose a medalla de bronce.
Entre os catro atletas seleccionados había dúas mulleres, Eva Queimaño e Lucía Sánchez del Valle, que foron fundamentais na consecución do metal. A primeira delas, do Bidasoa Atletiko, competiu na categoría absoluta e foi quen de acadar a súa MMT en aire libre, chegando aos 4.736 puntos. Este resultado mellora en 30 puntos a última actuación da internacional, no campionato de Pontevedra celebrado na pasada semana.
Pola súa parte, Sánchez del Valle, da Escuela Atlética Lucense, logrou a segunda posición na competición Sub-18, sumando 4.989 puntos. Un excelente resultado que porén non subirá á táboa de récords galegos polo reglamento.
Como atletas masculinos acudiron á cita Aitor Fernández, quen competiu en sub18 rematando en sexto lugar, e Adolfo Sáinz, repetindo a sexta posición da última edición. O equipo completouse con Julio Santiago e Aitor Fernández como responsables técnicos da Selección Galega.
Superaron á Selección Galega Murcia e Valencia
Por riba do conxunto irmandiño quedou a Selección de Murcia, segundo clasificado do campionato con 22.636 puntos, e a Selección da Comunidade Valenciana, con 25.008 puntos. As galegas acadaron un total de 21.458 puntos, superando a equipos potentes do talle do combinado catalán, o madrileño ou o vasco.
