A Copa Galicia XCO iniciará proximamente a súa edición do 2022. O campionato autonómico de Cross Country Olímpico presenta o seu calendario que abranguirá pouco máis de tres meses cun total de nove probas. Esta será unha competición que combinará citas clásicas do panorama autonómico con outras que se van consolidando e cunha estrea.
O torneo dará comezo en abril, onde desfrutaremos de catro eventos. A Copa Galicia XCO arrancará o domingo 3 de abril coa novena edición do Trofeo BTT Rallie Cidade de Ferrol e continuará na provincia da Coruña co V XCO Caimanes en Betanzos o domingo 10 de abril.
Xa na segunda quincena trasladarase ao sur da provincia de Pontevedra: o II Trofeo XCO Concello do Porriño está fixado para o domingo 17 e o IV Trofeo BTT-XCO Grupeta Pan de Zarko terá como escenario A Cañiza o sábado 23.
Tras dúas fins de semana de paréntese, a Copa Galicia XCO regresará o sábado 14 de maio cun debut no calendario autonómico. O Team Bike Outeiro de Rei organiza o primeiro XCO Penas de Rodas. Dunha estrea na provincia de Lugo pasarase á proba decana do Cross Country Olímpico galego coa disputa o sábado 28 de maio en terras coruñesas do XXI Gran Premio Concello de Cambre de BTT.
Tal e como apunta a Federación Galega de Ciclismo, a recta final da Copa comezará con dous sábados de competición en xuño. O día 11 será a quenda do IV XCO Concello de Oroso e unha semana máis tarde, do Xaxanbike 22 en Marín. A clausura do certame autonómico chegará o sábado 9 de xullo, ao igual que aconteceu o pasado ano, realizarase en Ribadumia co II XCO Kiwi Atlántico.
O calendario da Copa Galicia XCO
- 3/04 Trofeo BTT Rallie Cidade de Ferrol – Ferrol C.C.
- 10/04 XCO Caimanes – Caimanes Betanzos, C. BTT
- 17/04 Trofeo XCO Concello do Porriño – Avanza, A.D.
- 23/04 Trofeo BTT-XCO Grupeta Pan de Zarko – Grupeta Pan de Zarko C.
- 14/05 XCO Penas de Rodas – Team Bike Outeiro de Rei C.
- 28/05 Gran Premio Concello de Cambre de BTT – Cambre C.C.
- 11/06 XCO Concello de Oroso – Tambre Bike C.C.
- 18/06 Xaxanbike 22 – XSM, C.C.
- 9/07 XCO Kiwi Atlántico – Ribadumia C.C.
