A Federación Galega de Atletismo sumou éxitos no Campionato de España de pista Cuberta Sub18. Ata catro galegas subiron ao podio, sumando un ouro, unha prata e dous bronces.
A gran protagonista foi Xela Martínez, quen respondeu á súa calidade de favorita e acadou o récord do campionato na proba dos 1500 metros. Cun rexistro de 4:26.76, a galega superou con amplitude ás súas contrincantes para sumar outro metal á súa colección. Ademais, é ela mesma quen ostenta o récord de España nesta proba, cun tempo de 4:23.18.
Outra das estrelas galegas foi Carlota Salgado en combinadas. Malia o ¨tropezo¨ nunha das súas probas fortes como é a altura, a atleta recompúxose para lograr MMP tanto na lonxitude como nos 800 m. Coas súas marcas, Salgado fíxose co subcampionato nacional cunha MMP de 3.504
Precisamente sobre o concurso de altura Emma Sihuang Pérez refrendaba esa terceira mellor marca das participantes logo de saltar ata os 1.71 m. que facían que novamente- e como xa fixera o ano pasado- lograra unha extraordinara medalla de bronce no campionato nacional.
A última das medallas, segundo apunta a Federación Galega de Atletismo, correspondía á velocista Ainhoa Reparaz. Neste torneo a galega logrou a súa segunda mellor marca persoal en pista cuberta nas semifinais dos 200 m. con 24.85 para, xa na final, rematar en 24.89 que lle daban o bronce sobre o sintético levantino.
As outras atletas galegas destacadas
De igual modo resultaron tamén salientables os postos de finalistas logrados por Sergio Quintas do C.D. Las Purísima nos 1.500 con 4:03.01; Xoel Otero do A.A. Mazí en triplo con 13.85 m. e Alicia Barreiro do Ría Ferrol nos 400 m. con 58.14.
Mención aparte ten o sétimo lugar da plusmarquista galega do Celta Lisa Vosberg quen non tivo o seu día no concurso de pértega no que saltaba ata 3.32 m. sobre un listón no que recentemente voaba ata os 3.60 m.