O Diario Oficial de Galicia (DOG) vén de publicar este xoves o anuncio do Plan de Patrocinio dos equipos de alta competición de Galicia do exercicio de 2021.
En total, serán 238 equipos invitados (129 masculinos, 102 femininos e 7 mixtos) e contará cun financiamento de 3,15 millóns de euros (3.146.000 euros).
Cómpre destacar que, grazas á colaboración da Axencia Turismo de Galicia e ABANCA, o vindeiro Plan de Patrocinio dos equipos de alta competición de Galicia, correspondente ao exercicio de 2022, sumará un total de preto de 3,9 millóns de euros (3.872.000 euros).
En total, desde a primeira edición do plan de patrocinio no curso 2009/2010, os equipos de alta competición de Galicia recibiron máis de 33 millóns de euros.
A entidade invitada a tomar parte no procedemento presentará a solicitude obrigatoriamente por medios electrónicos a través do formulario dispoñible na sede electrónica da Xunta de Galicia.
O prazo máximo para a presentación das solicitudes para estes patrocinios será de sete días naturais contado dende a propia data de recepción da invitación, do 4 ao 10 de xuño, ambos inclusive.
A Fundación Deporte Galego, tendo en conta que nos seus fins se inclúe o fomento da actividade física e do deporte base e de alta competición en Galicia, pon en marcha a XII edición do Plan de patrocinio dos equipos de alta competición de Galicia (exercicio 2021).
A Fundación remitiralle un correo electrónico á entidade obxecto de patrocinio en que a convidará para a presentación da solicitude de patrocinio e xuntará o texto do plan de patrocinio.
A entidade invitada a tomar parte no procedemento PR960A presentará a solicitude obrigatoriamente por medios electrónicos a través do formulario normalizado (anexo I), dispoñible na sede electrónica da Xunta de Galicia, https://sede.xunta.gal
De conformidade co artigo 68.4 da Lei 39/2015, do 1 de outubro, do procedemento administrativo común das administracións públicas, se algunha das persoas interesadas presenta a súa solicitude presencialmente, será requirida para que a emende a través da súa presentación electrónica. Para estes efectos, considérase como data de presentación da solicitude aquela en que fose realizada a emenda.
Para a presentación electrónica para optar aos patrocinios poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365). Na Guía de procedementos e servizos habilitarase unha ligazón co código PR960A.
O prazo máximo para a presentación das solicitudes será de 7 días naturais contado dende a propia data de recepción da invitación. A presentación das proposicións por unha vía diferente á sinalada será causa de rexeitamento ou exclusión.
As bases poderanse consultar na ligazón https://deporte.xunta.gal/gl/convocatorias/plan-patrocinio-equipos-alta-competicion-galicia-2021.