Segunda xornada desta nova tempada da Superliga Feminina 2, e segunda vitoria para o equipo que dirixe Jorge Barrero. As coruñesas do CV Zalaeta lograron impoñerse ao Extremadura Arroyo en tres sets a cero (25-11, 25-16 e 25-23) nun partido dedicado especialmete ao seu público, que non defrauda.
Tres puntos máis para sumar na clasificación que nos permiten colocarnos en primeira posición a falta do último encontro da xornada. O primeiro set foi de claro dominio local. A pesar dun bo inicio na rede das estremeñas, facendo valer a súa liña de bloqueo máis alta, as nosas non dubidaron, e cun bo traballo de saque e defensa selaron o parcial pola vía rápida cun claro 25-11.
Unha tónica similar caracterizou ao segundo set, cun equipo local moi concentrado e compacto que non quería deixar escapar a oportunidade de puntuar na súa casa. Un tempo morto do técnico visitante, Pablo Alonso, no 16-6 parece darlle osíxeno ás súas xogadoras, que conseguen recortar distancia no marcador. Con todo, unha inspirada e acertada Alba Quirós ao saque asegurou a vantaxe colexial e axudou ás súas compañeiras para pechar no 25-16.
O terceiro e último set foi o máis axustado de todos, e o que máis fixo vibrar as bancadas do Barrio das Flores. Os cambios no septeto por parte do Extremadura Arroyo, e quizais a relaxación de ir gañando 2/0 por parte das do CV Zalaeta, serviron para que as visitantes puxésense por primeira vez por diante no tanteo: 5-8, 12-16, 19-21 foron os marcadores nos tempos mortos.
Pasado o ecuador do punto 20, os embistes finais do set tiveron unha clara cor co CV Zalaeta: levantadas polo seu público, as nosas subiron de marcha, apertaron co saque e empataron o parcial. Unha recepción perfecta de Noa pasou polas mans de Patricia directa a un ataque en perna de atrás de Andrea sentenciou o set e o partido.
O CV Zalaeta é segundo
Logo deste 3-0 na segunda xornada o CV Zalaeta é segundo na táboa con seis puntos empatado a case todo co Santa Cruz Cuesta Piedra que só ten mellores cifras cas galegas nos puntos encaixados.
Gran traballo colectivo das coruñesas que se viu reflectido nas estatísticas: a central Andrea Rivas máxima anotadora do encontro con 12 puntos (5 bloqueos), ben secundada polas súas compañeiras Alba Quirós (10), Inés Rivas e Carla Herrero (8) e María Forteza-Rey (6).
Por parte das estremeñas, destacada o seu central Lozoya con (6) puntos. Mención especial ao debut na súa volta ás pistas da receptora Susana Suárez.
Na terceira xornada da SLF2 o CV Zalaeta visita a cancha do Madrid Chamberí. Será o sábado 18/10/25 a partir das 19:00 no Estadio Vallehermoso.
