A galega Yolanda Parga Rodríguez (A Coruña, 1978) incorpórase ao Comité Técnico de Árbitros da Real Federación Española de Fútbol como Responsable da Arbitraxe Feminina. Desta forma, a exárbitra asistente internacional, cunha dilatada experiencia tanto sobre o terreo de xogo como na xestión deportiva, pasa a formar parte do grupo de traballo que encabeza Luís Medina Cantalejo como presidente do CTA.
A nivel nacional, Yolanda alcanzou a Segunda División do fútbol español na tempada 2006/2007. Como internacional, o seu primeiro gran logro foi a final da liga de Campións Feminina da UEFA disputada en Suecia en 2007. Ademais, estivo presente en dous mundiais femininos: Alemaña 2011 e Canadá 2015, onde estivo no trío arbitral da final. E tamén foi seleccionada para dous Xogos Olímpicos: Londres 2012 e Brasil 2016.
Segundo apunta a RFEF nunha nota informativa, desde 2017 Yolanda Parga exerceu como responsable da arbitraxe feminina e dos árbitros asistentes na Federación de Fútbol de Madrid. Ademais, desde 2018 tamén exerceu como informadora tanto das árbitras de Primeira Iberdrola, das que agora será responsable, como dos árbitros de 1ª e 2ª RFEF para o propio Comité Técnico de Árbitros da RFEF ao que agora se incorpora.
Este domingo, Yolanda Parga estará presente na Ciudad del Fútbol de Las Rozas para presenza a final da Supercopa que vai enfrontar ao FC Barcelona e ao Club Atlético de Madrid.
