- “Yasmin Batista ten forza, experiencia e capacidade para achegarnos equilibrio e calidade en ataque”, valora Andrés Hurtado
- formada nun dos países referentes do voleibol mundial, competiu en Superliga C, B e A con clubs históricos como Brasília Vôlei
O CV Arenal Emevé segue construíndo o seu persoal da tempada 2025/26 coa incorporación de Yasmin Batista (Brasil, 2000), central con ampla experiencia en ligas profesionais de Brasil e Portugal. Aos seus 25 anos, chega ao equipo lucense tras dúas boas campañas no GC Vilacondense portugués, onde disputou competicións como a Copa, a Taça Federação e a Primeira Divisão.
Formada nun dos países máis potentes do mundo en voleibol feminino, Yasmin Batista percorreu todas as categorías do sistema brasileiro.
Competiu na Superliga C, na B e tamén na Superliga A, unha das mellores ligas do planeta, defendendo ao Brasília Vôlei. Ademais, xogou en clubs como Martin Luther, Sada/Tambasa Argos, Vinhedo ou Pontz São José, adquirindo un perfil completo como bloqueadora central.
Andrés Hurtado: “Yasmin Batista é moi forte fisicamente”
“Yasmin Batista é unha xogadora moi forte fisicamente, cun brazo bastante poderoso e que nos vai a axudar sobre todo nos labores ofensivos dentro do noso sistema de xogo”, explica Andrés Hurtado, director de vóley do Arenal Emevé.
“Vén de facer dous moi boas tempadas en Portugal e estamos moi contentos coa súa incorporación”, apunta Andrés Hurtado. A dirección deportiva destaca tamén a súa madurez e a súa lectura táctica: “Achéganos ese salto de calidade e equilibrio que buscamos no centro da rede. En bloqueo, especialmente ante balóns altos, posiciónase moi ben e sabe interpretar o xogo”.
Con esta fichaxe, o CV Arenal Emevé continúa apontoando o seu persoal de Liga Iberdrola con xogadoras de proxección e percorrido internacional. Yasmin Batista súmase aos reforzos xa anunciados de María Barrasa, Amelia Porteiro, Anneclaire Ter Brugge e Irene Osayande, baixo a dirección de Alberto Chaparro.
