O CV Arenal Emevé, que seguirá un ano máis na Liga Iberdrola de voleibol tras asinar a salvación, xa comeza a preparar a tempada 2021 / 2022. Nela, contará cunha nova colocadora, a arxentina Yael Castiglione.
Esta xogadora, que formará parte das loitadoras no próximo curso, foi internacional con Arxentina competindo coas Panteras nos Xogos Olímpicos de Río 2016.
Castiglione, unha xogadora con experiencia para o Emevé
En palabras do Emevé, esta incorporación é “unha garantía de experiencia e fiabilidade na creación de xogo”. Esta non será a primeira aventura en España de Castiglione. A arxentina formou parte do CE Camp Escolar Lleida entre o 2007 e o 2009 e do CV Milenium A Coruña entre o 2005 e o 2006.
Ás súas costas, esta veterana xogadora conta con tempadas en clubs como o Boca Juniors ou o Dínamo de Bucarest, ademais de participar en campionatos como a Superliga brasileira o a TAURON Liga polaca.
Dentro do seu palmarés acumula títulos como a Liga e a Copa austríacas, a Copa rumana ou o subcampionato na MEVZA, a Liga da Europa Central.
No apartado internacional, a futura xogadora do Emevé suma dous subcampionatos de Sudamérica con Arxentina e tres bronces na Copa Panamericana. Ademais, Castiglione obtivo o recoñecemento de mellor colocadora no clasificatorio para Río 2016 e a Copa Panamericana 2013.
Agora, nesta nova etapa da súa carreira, a xogadora chega a Lugo disposta a vivir unha segunda plenitude. Despois de 13 anos nas pistas de todo o mundo, Castiglione apartouse temporalmente do voleibol para desfrutar da maternidade dos seus mellizos, nados no 2018.
Despois de dúas tempadas, a arxentina volveu á elite co Valinhos e co Pinheiros na Superliga brasileira. Para a próxima tempada, Castiglione vestirá a camiseta do Emevé e poderá demostrar na Liga Iberdrola que é capaz do mellor na elite europea.
